Правілы карыстання карткай

1. Агульныя палажэнні

Банкаўская плацежная картка, студэнцкая картка[1], віртуальная картка[2] (далей – картка) перадаецца Кліенту (Трымальніку карткі) у карыстанне на падставе заключанага паміж ААТ "ААБ Беларусбанк" (далей – Банк) і Кліентам дагавору бягучага (разліковага) банкаўскага рахунку з выкарыстаннем банкаўскай плацежнай карткі (далей – Дагавор) і (або) даверанасці Кліента, выдадзенай ва ўстаноўленым заканадаўствам Рэспублікі Беларусь парадку.

Рэквізіты віртуальнай карткі адлюстроўваюцца Кліенту ў сістэмах дыстанцыйнага банкаўскага абслугоўвання, якія вызначаюцца Банкам, код бяспекі (CVC2/CVV2-код) накіроўваецца SMS-паведамленнем на нумар мабільнага тэлефона Кліента.

Разам з карткай (акрамя віртуальнай карткі) Кліенту (Трымальніку карткі) у запячатаным выглядзе выдаецца канверт з персанальным ідэнтыфікацыйным кодам (ПІН-кодам), які генерыруецца аўтаматычна ў працэсе персаналізацыі карткі і выкарыстоўваецца для ідэнтыфікацыі Трымальніка карткі пры правядзенні аперацый.

Выпуск карткі можа ажыццяўляцца Банкам без фарміравання канверта з ПІН-кодам з наступным прадастаўленнем Кліенту (Трымальніку карткі) ПІН-кода з выкарыстаннем тэхналогіі e-PIN з дапамогай накіравання SMS-паведамлення на нумар мабільнага тэлефона Кліента (Трымальніка карткі).

Актывацыя карткі – працэдура зняцця (адмены) устаноўленага банкам у мэтах бяспекі пры выпуску карткі тэхнічнага абмежавання (забароны) яе выкарыстання.

Актывацыя карткі (акрамя віртуальнай карткі) ажыццяўляецца ў момант генерацыі ПІН-кода з выкарыстаннем тэхналогіі e-PIN або, калі паказаная тэхналогія не прымянялася (ПІН-код выдадзены на папяровым носьбіце), Кліентам (Трымальнікам карткі) самастойна пры здзяйсненні з выкарыстаннем карткі наступных аперацый, пацверджаных правільным уводам ПІН-кода: зняцце наяўных грашовых сродкаў; прагляд балансу (даступнага астатку) па картцы; аплата тавараў і паслуг; змена ПІН-кода. Картка актывуецца ў выпадку, калі пры правядзенні аперацыі праверка ПІН-кода пройдзена паспяхова, у тым ліку калі сама аперацыя адхілена (напрыклад, па прычыне недастатковасці сродкаў або ўстанаўлення па картцы лімітаў па правядзенні безнаяўных аперацый і (або) па атрыманні наяўных грашовых сродкаў). Картка не актывуецца ў выпадку няправільнага ўводу ПІН-кода, знаходжання карткі ў стоп-лісце (блакіроўкі карткі) і пры правядзенні з выкарыстаннем карткі аперацыі папаўнення рахунку.

Выкарыстанне карткі павінна ажыццяўляцца толькі Трымальнікам карткі, імя, прозвішча і (або) подпіс якога прастаўлены на картцы. Трымальнік карткі абавязаны праставіць асабісты подпіс на адваротным баку карткі (акрамя віртуальнай карткі) пры яе атрыманні.

Пры афармленні карткі Кліент пазначае ў заяве-анкеце (у выпадку афармлення віртуальнай карткі - у заяўцы ў электронным выглядзе, у выпадку афармлення студэнцкай карткі - у заяве аб выдачы студэнцкай карткі) кодавае  слова (дзявочае прозвішча маці). Пры неабходнасці ўдакладнення або змянення кодавага слова Кліенту неабходна звярнуцца ў аддзяленні ўстановы Банка па месцы адкрыцця рахунку з дакументам, які сведчыць асобу.

Пры здзяйсненні аперацый з выкарыстаннем карткі ці яе рэквізітаў адлюстраванне на рахунку Кліента аперацый ажыццяўляецца Банкам не пазней  за другі банкаўскі дзень, наступны за днём атрымання Банкам інфармацыі, неабходнай у адпаведнасці з лакальнымі нарматыўнымі прававымі актамі Банка для адлюстравання аперацый па рахунку Кліента.

У сувязі з тым, што дзень папаўнення рахунку Кліента і дзень залічэння грашовых сродкаў на рахунак Кліента могуць не супадаць, пагашэнне наяўных па рахунку Кліента запазычанасцей, працэнтаў, штрафных санкцый, няўстоек, узнагароджанняў па аперацыях з карткамі, пагашэнне якіх у адпаведнасці з умовамі Дагавору ажыццяўляецца з паступаючых на рахунак Кліента грашовых сродкаў, ажыццяўляецца Банкам пасля адлюстравання аперацыі залічэння па рахунку Кліента.

2. Карыстанне карткай і персанальным ідэнтыфікацыйным кодам (ПІН-код)

З дапамогай карткі (акрамя віртуальнай карткі) можна разлічыцца за тавары і паслугі ў арганізацыях гандлю (сэрвісу) (далей – АГС), ажыццявіць розныя аперацыі ў банкаматах, інфакіёсках, пунктах прыёму камунальных плацяжоў (далей – ППКП), з дапамогай паслуг дыстанцыйнага банкаўскага абслугоўвання (SMS-банкінг, М-банкінг, Інтэрнэт-банкінг і інш.) і сеткі Інтэрнэт (на ўмовах, вызначаных Банкам), а таксама атрымаць наяўныя грашовыя сродкі ў пунктах выдачы наяўных грашовых сродкаў (далей – ПВН) і банкаматах, калі іншае не вызначана Дагаворам. З дапамогай віртуальнай карткі можна аплачваць розныя паслугі, разлічвацца за тавары (паслугі) у АГС і здзяйсняць іншыя аперацыі з дапамогай паслуг дыстанцыйнага банкаўскага абслугоўвання (SMS-банкінг, М-банкінг, Інтэрнэт-банкінг і інш.) і ў сетцы Інтэрнэт (на ўмовах, вызначаных Банкам).

Пры аплаце з выкарыстаннем карткі тавараў і паслуг у АГС, пералік якіх размешчаны на карпаратыўным вэб-сайце Банка, Трымальнік карткі можа атрымліваць зніжкі.

Пры выкарыстанні карткі для аплаты тавараў і паслуг у АГС, ажыццяўлення плацяжоў у ППКП, а таксама для атрымання наяўных грашовых сродкаў у ПВН Трымальнік карткі павінен увесці ПІН-код і (або) распісацца на карт-чэку, які пацвярджае правядзенне аперацыі, папярэдне пераканаўшыся, што ў дадзеным карт-чэку правільна пазначаны нумар карткі, дата і сума аперацыі (пры выкарыстанні карткі за межамі Рэспублікі Беларусь – і валюта аперацыі).

Пры выкарыстанні карткі для аплаты тавараў і паслуг у АГС, якія ўдзельнічаюць у праграмах плацежных сістэм (напрыклад, Visa Easy Payment Service (VEPS)), увод ПІН-кода і прастаўленне Трымальнікам карткі подпісу на карт-чэку не патрабуецца пры здзяйсненні аперацыі аплаты ў межах устаноўленага плацежнай сістэмай ліміту па суме здзяйсняемага плацяжу.

Пры выкарыстанні для аплаты тавараў і паслуг у АГС бескантактавай карткі магчыма ажыццяўленне аперацый без уводу ПІН-кода і подпісу Трымальніка карткі на карт-чэку (за выключэннем першай аперацыі з выкарыстаннем карткі, якая павінна быць здзейснена з абавязковым уводам ПІН-кода). У выпадку перавышэння ўстаноўленага банкам ліміту па суме здзяйсняемага плацяжу аперацыю з выкарыстаннем бескантактавай карткі неабходна пацвердзіць уводам ПІН-кода або подпісам Трымальнікі карткі. Факт правядзення аплаты па бескантактавай картцы пацвярджаецца гукавым сігналам і надпісам на экране тэрмінала.

Правядзенне плацяжоў з дапамогай паслуг дыстанцыйнага банкаўскага абслугоўвання, сеткі Інтэрнэт ажыццяўляецца з выкарыстаннем рэквізітаў карткі і (або) сродкаў доступу, якія дазваляюць правесці аўтэнтыфікацыю Трымальніка карткі. Азнаёміцца з інфармацыяй аб парадку атрымання пароля 3-D Secure, што прымяняецца для правядзення плацяжоў у сетцы Інтэрнэт, Інтэрнэт Пароля БЕЛКАРТ можна на карпаратыўным вэб-сайце Банка. Правядзенне аперацый у банкаматах і інфакіёсках ажыццяўляецца з уводам ПІН-кода.

Трымальнік карткі можа змяніць ПІН-код карткі (акрамя віртуальнай карткі) у банкаматах Банка. За змену ПІН-кода Банк спаганяе плату ў адпаведнасці з дзеючымі ў Банку ўзнагароджаннямі.

Трымальнік карткі павінен мець на ўвазе, што пры ажыццяўленні аперацый з выкарыстаннем карткі ў ПВН, ППКП і АГС касіры звяраюць яго подпіс на картцы і на карт-чэку. Калі подпісы не супадаюць, подпіс на картцы адсутнічае, а таксама пры ўзнікненні абгрунтаванага сумнення ў прыналежнасці карткі Трымальніку, касір мае права патрабаваць у Трымальніка дакумент, які сведчыць асобу, каб пераканацца, што ён з’яўляецца законным Трымальнікам гэтай карткі. У выпадку адсутнасці дакумента касір мае права адмовіць Трымальніку карткі ў абслугоўванні. Пры гэтым выконваецца адмена праведзенай аперацыі і Трымальніку карткі выдаецца карт-чэк, падпісаны касірам.

Інфармацыю аб  філіялах, ЦБП, аддзяленнях, банкаматах і інфакіёсках Банка, якія абслугоўваюць Трымальнікаў картак, можна атрымаць на карпаратыўным вэб-сайце і ў Кантакт-цэнтры Банка.

Пашкоджанне паласы для подпісу на адваротным баку карткі і праява на ёй слова "VOID" або "Недействительна" можа паслужыць падставай для адмовы Трымальніку карткі ў абслугоўванні. Па пісьмовай заяве Кліента Банк выдае Кліенту (Трымальніку) новую картку (дублікат карткі).

Калі пры ажыццяўленні аперацыі ў банкамаце (інфакіёску) картка ўстройствам не вернута, Трымальнік карткі павінен яе заблакіраваць, патэлефанаваўшы ў кругласутачную службу сэрвісу кліентаў ААТ "Банкаўскі працэсінгавы цэнтр" (далей – ААТ "БПЦ")[3] па тэл. (017) 299 25 26, або з выкарыстаннем паслуг SMS-банкінг, М-банкінг, Інтэрнэт-банкінг. Затрыманая картка накіроўваецца банкам, які абслугоўвае банкамат (інфакіёск), ва ўстанову Банка па месцы адкрыцця рахунку Кліента. Атрымаць аператыўную інфармацыю аб тэрмінах выемкі і перадачы затрыманай карткі можна ў аператарскай службе па тэлефонах, пазначаных на знешняй частцы банкамата (інфакіёска). Пасля атрымання затрыманай карткі Трымальнік павінен яе разблакіраваць, патэлефанаваўшы ў кругласутачную службу сэрвісу кліентаў ААТ "БПЦ"3 па тэл. (017) 299 25 25, або з выкарыстаннем паслуг SMS-банкінг, М-банкінг, Інтэрнэт-банкінг.

Пры ажыццяўленні з выкарыстаннем карткі аперацый па аплаце тавараў (паслуг) у інфакіёсках (банкаматах), з дапамогай паслуг дыстанцыйнага банкаўскага абслугоўвання грашовыя сродкі пералічваюцца Банкам згодна з пазначанымі (выбранымі) Трымальнікам карткі рэквізітамі. У выпадку выяўлення няправільна пазначаных (выбраных) рэквізітаў Трымальнік карткі павінен з дакументам, які пацвярджае ажыццяўленне аперацыі (карт-чэкам або пісьмовай інфармацыяй (даведкай) аб плацяжы, прадастаўленай Банкам), і заявай звярнуцца да атрымальніка плацяжу для вяртання памылкова пералічаных грашовых сродкаў.

У выпадку трохразовага няправільнага ўводу ПІН-кода картка аўтаматычна блакіруецца. Для разблакіроўкі карткі Кліент (Трымальнік карткі) павінен патэлефанаваць у кругласутачную службу сэрвісу кліентаў ААТ "БПЦ"3 па тэл. (017) 299 25 25. Пасля разблакіроўкі карткі Кліенту (Трымальніку карткі) даецца адна спроба для ўводу ПІН-кода (у выпадку няправільнага ўводу ПІН-кода картка блакіруецца паўторна). У выпадку трохразовага няправільнага ўводу ПІН-кода пры ажыццяўленні аперацый шляхам счытвання інфармацыі з убудаванага ў картку мікрапрацэсара блакіруецца мікрапрацэсар (на мікрапрацэсар запісваецца інфармацыя аб перавышэнні дапушчальнай колькасці спроб уводу няправільнага ПІН-кода), у выніку чаго далейшае ажыццяўленне аперацый шляхам счытвання інфармацыі з мікрапрацэсара карткі становіцца немагчымым. Разблакіроўка мікрапрацэсара ў названым выпадку ажыццяўляецца аўтаматычна пры ажыццяўленні ў банкамаце аперацыі, пацверджанай уводам правільнага ПІН-кода.

Трымальнік карткі абавязаны берагчы картку ад механічных пашкоджанняў, уздзеяння электрамагнітных палёў, высокіх і нізкіх тэмператур, прамых сонечных промняў, вільгаці і іншых неспрыяльных фактараў, якія могуць прывесці да страты карткай працаздольнасці.

3. Бяспечнае выкарыстанне карткі

Трымальнік карткі абавязаны захоўваць свой ПІН-код у бяспечным і недаступным для іншых асоб месцы. Забараняецца захоўваць ПІН-код і картку разам, пазначаць ПІН-код на картцы, перадаваць ПІН-код па электроннай пошце, па тэлефоне або факсе, пазначаць ПІН-код пры правядзенні плацяжоў у сетцы Інтэрнэт, а таксама паведамляць яго іншым асобам (у тым ліку работнікам банка і праваахоўных органаў).

Не варта нікому паведамляць рэквізіты карткі (нумар, тэрмін дзеяння, значэнне CVC2/CVV2-код), а таксама іншыя канфідэнцыяльныя звесткі: пароль 3-D Secure, лагін і пароль для ўваходу ў сістэму Інтэрнэт-банкінг, даныя карты кодаў для ўваходу ў сістэму Інтэрнэт-банкінг, код рэгістрацыі SMS-банкінгу, любыя аднаразовыя СМС-коды, якія накіроўваюцца Банкам і інш.

Пры правядзенні аперацый з выкарыстаннем карткі рэкамендуецца захоўваць карт-чэкі да моманту атрымання выпіскі па рахунку для далейшай зверкі сум на чэках з сумамі ў выпісцы па рахунку.

У выпадку выяўлення разыходжанняў паміж аперацыямі і сумамі, пазначанымі ў выпісцы і фактычна здзейсненымі па картцы, Кліент абавязаны інфармаваць Банк па сутнасці выяўленых разыходжаннях у парадку і тэрміны, устаноўленыя раздзелам 5 гэтых Правілаў.

Перад ажыццяўленнем аперацыі ў банкамаце Трымальнік карткі павінен уважліва агледзець яго знешнюю частку і ПІН-клавіятуру. У гэтых месцах не павінна знаходзіцца прымацаваных пабочных прадметаў і накладак. Пры ўзнікненні сумненняў Трымальнік карткі не павінен устаўляць картку ў банкамат. Таксама забараняецца ўстаўляць картку ў банкамат, калі яна ўваходзіць у картапрыёмнік з вялікім намаганнем. Пры ўводзе канфідэнцыйнай інфармацыі Трымальнік карткі павінен знаходзіцца як можна бліжэй да банкамата (інфакіёска), рэкамендуецца ўводзіць ПІН-код сярэднім пальцам рукі (пры гэтым далонь рукі аказваецца раскрытай і зламысніку значна складаней убачыць, якія кнопкі націскаюцца), закрываючы, па магчымасці, другой рукой клавіятуру ад чужога погляду. У выпадку неатрымання (атрымання не ў поўным аб’ёме) запытаных у банкамаце грашовых сродкаў Кліент (Трымальнік карткі) павінен звярнуцца з заявай у Банк (па магчымасці запомніўшы адрас, па якім устаноўлены банкамат).

Перад паездкай за мяжу Кліент (Трымальнік карткі) павінен удакладніць у Банку інфармацыю аб магчымых абмежаваннях выкарыстання карткі ў краінах з павышанай рызыкай махлярскага выкарыстання картак, якія могуць быць устаноўлены Банкам у мэтах забеспячэння бяспекі ажыццяўлення аперацый з карткамі. Акрамя таго, у мэтах своечасовага выяўлення несанкцыянаваных аперацый і спынення далейшага іх ажыццяўлення шляхам блакіроўкі карткі рэкамендуецца падключыць паслугу SMS-апавяшчэнне, якая дазваляе атрымліваць інфармацыю аб аперацыях з карткай у рэжыме рэальнага часу.

Пры правядзенні аперацый у арганізацыях гандлю і сэрвісу, даючы картку абслуговаму персаналу, Трымальнік карткі не павінен выпускаць яе з поля зроку.

Пры браніраванні атэля з выкарыстаннем рэквізітаў карткі Трымальнік карткі павінен уважліва вывучыць умовы браніравання і яе адмены.

Паколькі правядзенне плацяжоў у сетцы Інтэрнэт звязана з высокай рызыкай незаконнага доступу трэцімі асобамі да інфармацыі аб рэквізітах карткі перад правядзеннем названых плацяжоў Трымальнік карткі павінен азнаёміцца з Дагаворам аб правядзенні з выкарыстаннем картак Банка плацяжоў у сетцы Інтэрнэт і Правіламі выкарыстання картак Банка для аплаты тавараў і паслуг у сетцы Інтэрнэт з прымяненнем тэхналогій 3-D Secure і Інтэрнэт Пароль БЕЛКАРТ на карпаратыўным вэб-сайце Банка.

4. Правядзенне валютна-абменных аперацый

4.1. па картках для выкарыстання толькі ў Рэспубліцы Беларусь (палажэнні гэтага пункта прымяняюцца ў адносінах да Дагавораў, якія прадугледжваюць ажыццяўленне валютна-абменных аперацый)

Пры ажыццяўленні Трымальнікам карткі аперацыі ў замежнай валюце з выкарыстаннем карткі ў сетцы ўстройстваў (з выкарыстаннем сэрвісаў і паслуг) Банка і ў АГС, абслугоўваемых Банкам (далей – сетка абслугоўвання Банка), валютна-абменныя аперацыі ажыццяўляюцца па абменным курсе, устаноўленым Банкам для правядзення аперацый пры выкарыстанні картак на дату і час ажыццяўлення аперацыі Трымальнікам карткі. Пры выкарыстанні карткі БЕЛКАРТ ажыццяўленне аперацый у замежнай валюце дапускаецца толькі ў сетцы абслугоўвання Банка.

Пры ажыццяўленні Трымальнікам карткі аперацыі ў замежнай валюце з выкарыстаннем карткі ў сетцы ўстройстваў (з выкарыстаннем сэрвісаў і паслуг) іншых банкаў і ў АГС, абслугоўваемых іншымі банкамі (далей – сетка абслугоўвання іншых банкаў), падключаных да ААТ "БПЦ", валютна-абменныя аперацыі ажыццяўляюцца па абменным курсе, устаноўленым Банкам для правядзення аперацый пры выкарыстанні картак на дату ажыццяўлення аперацыі Трымальнікам карткі. Азнаёміцца з пералікам банкаў, падключаных да ААТ "БПЦ", можна на карпаратыўным вэб-сайце Банка.

Пры ажыццяўленні Трымальнікам карткі аперацыі ў замежнай валюце з выкарыстаннем карткі ў сетцы абслугоўвання іншых банкаў, не падключаных да ААТ "БПЦ", сума аперацыі канверсуецца міжнароднай плацежнай сістэмай у валюту разліку Банка з сістэмай (долары ЗША) па абменным курсе, устаноўленым плацежнай сістэмай на дату правядзення разлікаў па аперацыях з карткамі Банка, якая не супадае з датай ажыццяўлення аперацыі Трымальнікам карткі. Далей Банк ажыццяўляе продаж Кліенту (куплю ў Кліента) долараў ЗША па абменным курсе, устаноўленым Банкам для правядзення аперацый пры выкарыстанні картак на дату ажыццяўлення аперацыі Трымальнікам карткі.

4.2. па міжнародных картках

Валютна-абменныя аперацыі ажыццяўляюцца ў выпадку несупадзення валюты аперацыі з валютай рахунку Кліента.

Пры ажыццяўленні Трымальнікам карткі аперацыі з выкарыстаннем карткі ў сетцы абслугоўвання Банка валютна-абменныя аперацыі ажыццяўляюцца па абменным курсе, устаноўленым Банкам для правядзення аперацый пры выкарыстанні картак на дату і час ажыццяўлення аперацыі Трымальнікам карткі.

Пры ажыццяўленні Трымальнікам карткі аперацыі з выкарыстаннем карткі ў сетцы абслугоўвання іншых банкаў, падключаных да ААТ "БПЦ", валютна-абменныя аперацыі ажыццяўляюцца па абменным курсе, устаноўленым Банкам для правядзення аперацый пры выкарыстанні картак на дату ажыццяўлення аперацыі Трымальнікам карткі.

Пры ажыццяўленні Трымальнікам карткі аперацыі з выкарыстаннем карткі ў сетцы абслугоўвання іншых банкаў, не падключаных да ААТ "БПЦ" (акрамя аперацый у еўра і расійскіх рублях, а таксама аперацый за межамі Рэспублікі Беларусь), валютна-абменныя аперацыі ажыццяўляюцца па абменным курсе, устаноўленым Банкам для правядзення аперацый пры выкарыстанні картак на дату ажыццяўлення аперацыі Трымальнікам карткі.

Пры ажыццяўленні Трымальнікам карткі аперацыі ў еўра або ў расійскіх рублях з выкарыстаннем карткі ў сетцы абслугоўвання іншых банкаў, не падключаных да ААТ "БПЦ", а таксама аперацыі з выкарыстаннем карткі ў сетцы абслугоўвання іншых банкаў за межамі Рэспублікі Беларусь сума аперацыі канверсуецца міжнароднай плацежнай сістэмай у валюту разліку Банка з сістэмай (долары ЗША) па абменным курсе, устаноўленым плацежнай сістэмай на дату правядзення разлікаў па аперацыях з карткамі Банка, якая не супадае з датай ажыццяўлення аперацыі Трымальнікам карткі. Далей Банк ажыццяўляе па рахунках кліентаў, адкрытых у беларускіх рублях, продаж Кліенту (куплю ў Кліента) долараў ЗША (па рахунках кліентаў, адкрытых у еўра, канверсію еўра ў долары ЗША або канверсію долараў ЗША ў еўра; па рахунках кліентаў, адкрытых у расійскіх рублях, канверсію расійскіх рублёў у долары ЗША або канверсію долараў ЗША ў расійскія рублі) па абменным курсе, устаноўленым Банкам для правядзення аперацый пры выкарыстанні картак на дату ажыццяўлення аперацыі Трымальнікам карткі.

Пры ажыццяўленні Трымальнікам карткі аперацый з выкарыстаннем карткі ў АГС за межамі Рэспублікі Беларусь валютна-абменныя аперацыі могуць ажыццяўляцца з  прымяненнем паслугі «Дынамічная канвертацыя валюты» (Dynamyc Currency Conversion – DCC). Азнаёміцца з інфармацыяй аб паслузе DCC можна на карпаратыўным вэб-сайце Банка.

Пры выкарыстанні карткі БЕЛКАРТ-Maestro ажыццяўленне аперацый у замежнай валюце ў сетцы абслугоўвання іншых банкаў, якія з’яўляюцца ўдзельнікамі сістэмы БЕЛКАРТ, не дапускаецца. Азнаёміцца з пералікам банкаў – удзельнікаў сістэмы БЕЛКАРТ можна на вэб-сайце www.belkart.by.

Банк не можа ўплываць на памеры і тэрміны ўстанаўлення курсаў плацежнай сістэмы.

На працягу працоўнага дня ўстаноўленыя Банкам на бягучую дату абменныя курсы для правядзення аперацый пры выкарыстанні картак могуць быць зменены шляхам выдання новага распараджэння. Пры выкарыстанні картак у сетцы абслугоўвання Банка новыя значэнні курсаў для правядзення валютна-абменных аперацый на бягучую дату прымяняюцца з даты і часу, вызначаных у распараджэнні. Пры выкарыстанні картак у сетцы абслугоўвання іншых банкаў курсы, устаноўленыя апошнім распараджэннем, прымяняюцца для правядзення валютна-абменных аперацый на бягучую дату, незалежна ад фактычнага часу ажыццяўлення аперацыі Трымальнікам карткі.

Кліент нясе адказнасць за перавышэнне астатку па рахунку і (або) ліміту авердрафту, вызначанага Дагаворам, у тым ліку і ў выпадку ўзнікнення курсавых розніц пры ажыццяўленні аперацый з выкарыстаннем карткі, звязаных з ажыццяўленнем валютна-абменных аперацый.

5. Выпіскі па рахунку Кліента і ўрэгуляванне прэтэнзій па іх

Штомесячна Банк прадастаўляе па патрабаванні Кліента выпіску аб руху грашовых сродкаў па рахунку Кліента, у якой утрымліваецца інфармацыя аб усіх праведзеных Кліентам (Трымальнікам карткі) і адлюстраваных па рахунку аперацыях за справаздачны месяц. У выпадку перавышэння астатку па рахунку і (або) ліміту авердрафту, устаноўленага Дагаворам, Кліент абавязаны вярнуць суму запазычанасці ў тэрмін, устаноўлены Дагаворам.

Атрымаць выпіску па рахунку Кліент (Трымальнік карткі) можа ў аддзяленнях установы Банка па месцы адкрыцця рахунку. Азнаёміцца з пералікам аддзяленняў устаноў Банка, якія ажыццяўляюць выдачу выпісак па рахунках, адкрытых у іншых установах Банка, можна на карпаратыўным вэб-сайце Банка.

Кліент таксама мае права аформіць паслугу па атрыманні штомесячнай выпіскі за папярэдні месяц на адрас электроннай пошты. Падключэнне паслугі ажыццяўляецца ў аддзяленнях установы Банка па месцы адкрыцця рахунку Кліента, або з выкарыстаннем паслуг М-банкінг, Інтэрнэт-банкінг. Банк не нясе адказнасць за дастаўку Кліенту выпіскі па рахунку за справаздачны месяц у выпадку, калі ў якасці спосабу атрымання выпіскі выбрана электронная пошта.

Кліентам Банка даступна паслуга атрымання міні-выпіскі, у якой утрымліваецца інфармацыя аб 10 апошніх аперацыях, здзейсненых з выкарыстаннем карткі (яе рэквізітаў), але не больш чым за 7 апошніх дзён. Атрымаць міні-выпіску можна з дапамогай паслугі Інтэрнэт-банкінг, а таксама ў інфакіёсках і банкаматах Банка (па віртуальных картках – толькі з дапамогай паслугі Інтэрнэт-банкінг)  са спагнаннем платы ў адпаведнасці з дзеючымі ў Банку ўзнагароджаннямі.

Атрымаць справаздачу аб аперацыях па рахунку за перыяд Кліент таксама можа ў сістэме Інтэрнэт-банкінг.

Для атрымання аператыўнай інфармацыі аб здзейсненых з выкарыстаннем карткі (яе рэквізітаў) прыходных і/або расходных аперацыях Трымальнік карткі можа аформіць паслугу SMS-апавяшчэнне. Падключэнне паслугі ажыццяўляецца ў аддзяленні ўстановы Банка па месцы адкрыцця рахунку, у інфакіёску або з выкарыстаннем сістэмы Інтэрнэт-банкінг. Інфармаванне аб здзейсненых з выкарыстаннем карткі (яе рэквізітаў) прыходных і/або расходных аперацыях таксама можа ажыццяўляцца ў рамках паслугі М-банкінг (пры выбары Трымальнікам карткі адпаведнага пакета паслуг).

У выпадку выяўлення разыходжанняў паміж аперацыямі і сумамі, пазначанымі ў выпісцы і фактычна здзейсненымі па картцы, Кліент абавязаны да 20 чысла наступнага за справаздачным месяца пісьмова інфармаваць Банк па сутнасці выяўленых разыходжаннях, звярнуўшыся для афармлення заявы аб узнікшай сітуацыі ў любое аддзяленне Банка або Кантакт-цэнтр, пасля чаго Банкам будзе праведзены дэталёвы разбор. Разгляд заявы Кліента ажыццяўляецца Банкам на працягу 15 працоўных дзён з моманту ее афармлення ў парадку, прадугледжаным лакальнымі нарматыўнымі прававымі актамі Банка. Тэрмін разгляду заявы Кліента можа быць прадоўжаны ў выпадках, якія патрабуюць прыцягнення іншых арганізацый (ААТ "БПЦ", іншых банкаў, плацежных сістэм, сэрвісных арганізацый і інш.).

Пры ўзнікненні падазрэнняў, звязаных з несанкцыянаваным выкарыстаннем карткі, Кліент (Трымальнік карткі) павінен неадкладна заблакіраваць картку, патэлефанаваўшы ў кругласутачную службу сэрвісу кліентаў ААТ "БПЦ"[4] па тэл. (017) 299 25 26, або з выкарыстаннем паслуг SMS-банкінг, М-банкінг, Інтэрнэт-банкінг і заявіць аб гэтым у Банк.

З мэтай ініцыявання працэсу вяртання грашовых сродкаў па аперацыях, не санкцыянаваных Трымальнікам карткі (за выключэннем выпадкаў, устаноўленых заканадаўствам), Кліент у тэрмін, які не перавышае 30 каляндарных дзён з даты атрымання ад Банка паведамлення аб руху грашовых сродкаў па рахунку, прадстаўляе ў Банк заяву на папяровым носьбіце. Тэрмін падачы заявы прадаўжаецца на перыяд, на працягу якога Кліент мае ўважлівую прычыну не падаваць заяву ў Банк (хвароба і інш.), але не можа перавышаць 90 каляндарных дзён з даты адлюстравання аперацыі па рахунку Кліента.

Датай атрымання Кліентам ад Банка паведамлення аб руху грашовых сродкаў па рахунку ў выпадку апратэставання Кліентам аперацыі лічыцца адна з найбольш ранніх дат:

  • дата накіравання Банкам Кліенту (Трымальніку карткі) SMS-паведамлення на нумар мабільнага тэлефона ў рамках падключанай Кліентам (Трымальнікам карткі) паслугі М‑банкінг або паслугі SMS-апавяшчэнне;
  • дата атрымання Кліентам (Трымальнікам карткі) у банкамаце, інфакіёску Банка, праз сістэму Інтэрнэт-банкінг міні-выпіскі аб аперацыях, здзейсненых з выкарыстаннем карткі або яе рэквізітаў;
  • дата атрымання Кліентам з выкарыстаннем сістэм Інтэрнэт-банкінг, М-банкінг выпіскі па рахунку аб аперацыях, здзейсненых з выкарыстаннем карткі або яе рэквізітаў;
  • дата атрымання Кліентам выпіскі па рахунку ва ўстанове Банка (калі Кліент не звяртаўся за выпіскай – 20 чысло месяца, наступнага за справаздачным);
  • дата накіравання Банкам Кліенту штомесячнай выпіскі па рахунку на адрас электроннай пошты;
  • дата накіравання (прадастаўлення) Банкам Кліенту (Трымальніку карткі) інфармацыі аб руху грашовых сродкаў па рахунку іншым спосабам, вызначаным Банкам.

Банк інфармуе Кліента на папяровым носьбіце або ў электронным выглядзе аб выніках разгляду заявы ў тэрмін, які не перавышае 45 каляндарных дзён з даты атрымання заявы Кліента, калі аперацыя пры выкарыстанні карткі здзейснена на тэрыторыі Рэспублікі Беларусь, і ў тэрмін, які не перавышае 90 каляндарных дзён з даты атрымання заявы Кліента, калі аперацыя пры выкарыстанні карткі здзейснена за межамі Рэспублікі Беларусь.

Інфармацыю пра баланс (даступны астатак) па картцы Трымальнік карткі можа атрымаць у банкамаце, інфакіёску, з выкарыстаннем паслуг SMS-банкінг, М-банкінг, Інтэрнэт-банкінг, а таксама ў кругласутачнай службе сэрвісу кліентаў ААТ "БПЦ"4 па тэл. (017) 299 25 25, (017) 299 25 23 (па віртуальных картках паслуга ў банкаматах і інфакіёсках недаступна). За прагляд балансу (даступнага астатку) па картцы Банка ва ўстройствах іншых банкаў спаганяецца плата ў адпаведнасці з дзеючымі ў Банку ўзнагароджаннямі. Трымальніку карткі БЕЛКАРТ "Дзіцячая", БЕЛКАРТ "Дзіцячая ФотаКартыа", БЕЛКАРТ "Карта навучэнца", для якога Кліентам устаноўлены ліміт па правядзенні безнаяўных аперацый і (або) па атрыманні наяўных грашовых сродкаў, што могуць быць здзейснены з выкарыстаннем дадатковай карткі ці яе рэквізітаў, можа ўстанаўлівацца забарона на прагляд балансу (даступнага астатку) па картцы ў банкаматах, інфакіёсках, ПВН, з выкарыстаннем паслуг SMS-банкінг, М-банкінг.

6. Страта карткі

Калі картка страчана або ўкрадзена, або іншай асобе стаў вядомы ПІН-код і/або рэквізіты карткі, Кліент (Трымальнік карткі) павінен неадкладна заявіць аб гэтым у кругласутачную службу сэрвісу кліентаў ААТ "БПЦ"[5] па тэл. (017) 299 25 26.

Акрамя таго, заблакіраваць картку магчыма з выкарыстаннем паслуг SMS-банкінг, М-банкінг, Інтэрнэт-банкінг.

У трохдзённы тэрмін (па картках для выкарыстання толькі ў Рэспубліцы Беларусь) і ў сямідзённы тэрмін (па міжнародных картках) пасля вуснай заявы аб страце (крадзяжы) карткі Кліент павінен зрабіць пісьмовую заяву ў Банк. Да пісьмовага паведамлення аб страце (крадзяжы) карткі Кліент поўнасцю адказвае за аперацыі, здзейсненыя з выкарыстаннем страчанай (украдзенай) карткі.

Новую картку Банк выдае па пісьмовай заяве Кліента. За перавыпуск карткі ў выпадку яе страты (крадзяжу) Банк спаганяе плату ў адпаведнасці з дзеючымі ў Банку ўзнагароджаннямі.

Перавыпуск віртуальных картак не ажыццяўляецца. Выпусціць новую віртуальную картку Кліент можа шляхам афармлення ў сістэмах дыстанцыйнага банкаўскага абслугоўвання, якія вызначаюцца Банкам, новай заяўкі ў электронным выглядзе.

Клieнт абавязаны ў выпадку неабходнасці прадаставіць Банку або ўпаўнаважанай ім асобе інфармацыю для расследавання абставін страты (крадзяжу) карткі. Калі Банк мае звесткі аб тым, што незаконнае выкарыстанне карткі адбылося са згоды Трымальніка карткі, то адказнасць нясе Клieнт.

7. Блакіраванне аперацый па картцы

Усе карткі, якія абвешчаны страчанымі або ўкрадзенымі, заносяцца ў спіс несапраўдных картак (стоп-ліст) для блакіроўкі аперацый па іх. Банк мае права прыпыніць або спыніць карыстанне карткай, у тым ліку змясціўшы яе ў стоп-ліст, у выпадках, вызначаных Дагаворам. Інфармаванне Кліента аб блакіроўцы карткі па ініцыятыве Банка ў мэтах прадухілення несанкцыянаванага доступу да рахунку Кліента ажыццяўляецца Банкам з дапамогай любых сродкаў сувязі, уключаючы паштовыя адпраўленні, тэлефонную сувязь, электронныя сродкі сувязі, у тым ліку SMS-паведамленні, факсімільная сувязь, электронная пошта і іншыя сродкі сувязі. За знаходжанне карткі ў стоп-лісце па прычыне страты (крадзяжу) карткі або па ініцыятыве Банка ў выпадку парушэння Трымальнікам карткі Правілаў карыстання карткай спаганяецца плата ў адпаведнасці з дзеючымі ў Банку ўзнагароджаннямі. Картка знаходзіцца ў стоп-лісце да заканчэння тэрміну яе дзеяння.

8. Прадаўжэнне тэрміну дзеяння і замена карткі

Па пісьмовай заяве Кліента Банк можа выдаць Кліенту (Трымальніку) картку на новы тэрмін.

У выпадку дачаснага выхаду карткі з ладу (дэфект магнітнай паласы (мікрапрацэсара), фізічнае пашкоджанне карткі, праява на паласе для подпісу слова "VOID" ("Недействительна"), адслаенне ламіната на картцы, якое перашкаджае яе абслугоўванню ва ўстройствах банкаў і інш.), страты ПІН-кода, змянення напісання П.І.І. Кліента (Трымальніка карткі) Банк па пісьмовай заяве Кліента (Трымальніка карткі) выдае новую картку (дублікат карткі).

Прадаўжэнне тэрміну дзеяння студэнцкіх картак не ажыццяўляецца.

Прадаўжэнне тэрміну дзеяння віртуальных картак і выраб іх дублікатаў не ажыццяўляюцца. Выпусціць новую віртуальную картку Кліент можа шляхам афармлення ў сістэмах дыстанцыйнага банкаўскага абслугоўвання, якія вызначаюцца Банкам, новай заяўкі ў электронным выглядзе.

За выраб карткі на новы тэрмін (выраб дубліката карткі) Банк спаганяе плату ў адпаведнасці з дзеючымі ў Банку ўзнагароджаннямі.

9. Рэкламацыі

Банк не нясе адказнасць за ўзнікненне канфліктных сітуацый па-за сферай яго кантролю, а менавіта:

  • за ліміты або абмежаванні, устаноўленыя іншымі банкамі, якія могуць закрануць інтарэсы Трымальніка карткі;
  • за якасць тавараў і паслуг, аплачаных з выкарыстаннем карткі;
  • за іншыя банкі і прадпрыемствы, якія адмовіліся па якіх-небудзь прычынах прыняць картку.

Тэлефоны Кантакт-цэнтра Банка:

  • 147 (адзіны даведачны нумар, даступны на ўсёй тэрыторыі Рэспублікі Беларусь)
  • +375 17 218 84 31 (для званкоў з-за мяжы Рэспублікі Беларусь)

Карпаратыўны вэб-сайт Банка:

www.belarusbank.by

 

[1] Студэнцкая картка - прадукт, які аб'ядноўвае функцыянальнасці асабістай дэбетавай банкаўскай плацежнай карткі Visa Classic (як плацежнага інструмента) і студэнцкага білета, што выкарыстоўваецца для аўтэнтыфікацыі студэнта на тэрыторыі ўстановы вышэйшай адукацыі (доступу ў навучальныя карпусы, бібліятэку, інтэрнаты, доступу да метадычных матэрыялаў у інфакіёсках устаноў вышэйшай адукацыі і інш.).

[2] Віртуальная картка - банкаўская плацежная картка, выпуск якой ажыццяўляецца без выкарыстання загатоўкі карткі.

[3] Пры звароце ў кругласутачную службу сэрвісу кліентаў ААТ "БПЦ" неабходна назваць аператару кодавае слова (дзявочае прозвішча маці), указанае Вамі ў заяве-анкеце пры афармленні карткі (у выпадку афармлення віртуальнай карткі - у заяўцы ў электронным выглядзе, у выпадку афармлення студэнцкай карткі - ў заяве аб выдачы студэнцкай карткі), і іншыя звесткі, запытаныя аператарам.

[4] Пры звароце ў кругласутачную службу сэрвісу кліентаў ААТ "БПЦ" неабходна назваць аператару кодавае слова (дзявочае прозвішча маці), указанае Вамі ў заяве-анкеце пры афармленні карткі (у выпадку афармлення віртуальнай карткі - у заяўцы ў электронным выглядзе, у выпадку афармлення студэнцкай карткі - ў заяве аб выдачы студэнцкай карткі), і іншыя звесткі, запытаныя аператарам.

[5] Пры звароце ў кругласутачную службу сэрвісу кліентаў ААТ "БПЦ" неабходна назваць аператару кодавае слова (дзявочае прозвішча маці), указанае Вамі ў заяве-анкеце пры афармленні карткі (у выпадку афармлення віртуальнай карткі - у заяўцы ў электронным выглядзе, у выпадку афармлення студэнцкай карткі - ў заяве аб выдачы студэнцкай карткі), і іншыя звесткі, запытаныя аператарам.