Давернае кіраванне акцыямі асобных дзяржаўных службовых асоб

Я спыніў дзяржаўную службу, што мне трэба зрабіць з акцыямі, якія я аддаў Вам на захоўванне?

Вам неабходна скасаваць заключаны з банкам дагавор давернага кіравання.

Варыянт 1: Для скасавання дагавору давернага кіравання звярніцеся ў любы філіял ААТ «ААБ Беларусбанк» для афармлення заявы на скасаванне дагавору. Пры сабе неабходна мець пашпарт і рэквізіты Вашага дзеючага ўкладнога або карт-рахунку, адкрытага ў ААТ «ААБ Беларусбанк». У выпадку адсутнасці рахунку ў ААТ «ААБ Беларусбанк» яго можна адкрыць на месцы.

Варыянт 2: Мы можам накіраваць Вам на электронную пошту форму заявы на скасаванне дагавору давернага кіравання і заявы на змяненне пашпартных даных (яе неабходна запоўніць, калі з моманту заключэння з Вамі дагавору змяніліся Вашы пашпартныя і(або) адрасныя даныя. Да такой заявы неабходна прыкласці копію пашпарта). Запоўненыя і падпісаныя Вамі заявы адпраўце на адрас: 220089, г. Мінск, пр. Дзяржынскага, д. 18.



Ці трэба прадстаўляць пенсіённае пасведчанне або копію працоўнай кніжкі для таго, каб скасаваць дагавор давернага кіравання?

Копіі дакументаў, якія пацвярджаюць спыненне дзяржаўнай службы, прадстаўляць не патрабуецца.



Дзе будуць захоўвацца мае акцыі пасля скасавання дагавору давернага кіравання?

Пасля скасавання дагавору давернага кіравання прыналежныя Вам акцыі будуць пераведзены ў дэпазітарый, які абслугоўвае эмітэнта акцый, дзе яны будуць захоўвацца ў выглядзе запісу на рахунку, адкрытым на Ваша імя. Тэлефоны і адрасы дэпазітарыеў размешчаны на сайце РУП «РЦДКП» (http://www.centraldepo.by/) у раздзеле «Даведачная інфармацыя/Дэпазітарыі».



Як мне атрымаць дывідэнды пасля скасавання дагавору давернага кіравання?

Усе дывідэнды, накопленыя за перыяд давернага кіравання, будуць пералічаны на Ваш укладны або карт-рахунак, пазначаны ў заяве на скасаванне дагавору давернага кіравання. У далейшым інфармацыю аб налічаных дывідэндах і тэрмінах іх выплаты можна атрымаць у акцыянерным таварыстве. Тэлефоны і адрасы акцыянерных таварыстваў размешчаны на сайце РУП «РЦДКП» (http://www.centraldepo.by/) у раздзеле «Даведачная інфармацыя/Эмітэнты».



Як я даведаюся, што дагавор давернага кіравання скасаваны?

Пасля скасавання дагавору давернага кіравання Вам будзе накіравана справаздача давернага кіраўніка, якая ўтрымлівае інфармацыю аб колькасці і намінальнай вартасці прыналежных Вам акцый, а таксама аб суме пералічаных Вам дывідэндаў.