З 22 верасня банк выводзіць на рынак новы комплексны прадукт у рамках рэалізацыі Указа Прэзідэнта Рэспублікі Беларусь №382 «Аб дзяржаўнай сістэме будаўнічых зберажэнняў».
У Беларусбанку з ліпеня 2006 года дзейнічала ўнікальная праграма, якая не мела аналагаў на рынку краіны — сістэма будаўнічых зберажэнняў. Яна была альтэрнатывай крэдытаванню на агульных падставах і дазваляла кліентам атрымаць мэтавы крэдыт на больш прывабных умовах.
За час працы сістэмы будзберажэнняў было адкрыта больш за 50 тысяч жыллёва-накапляльных укладаў, уведзена ў эксплуатацыю больш за 300 тысяч кв.м. жылля.
— Сёння на змену лакальнай сістэме будаўнічых зберажэнняў Беларусбанка прыходзіць новы комплексны прадукт з фінансавай падтрымкай у выглядзе прэміі дзяржавы, які з’яўляецца працягам нашай шматгадовай палітыкі па стварэнні даступных фінансавых інструментаў для будаўніцтва і набыцця жылля насельніцтвам, — падзялілася намеснік старшыні праўлення Беларусбанка Святлана Кажэкіна.
Дзяржаўная сістэма будаўнічых зберажэнняў мае шэраг пераваг:
- больш кароткія тэрміны накаплення — 26, 38 і 62 месяцы (3 планы);
- розныя прапорцыі суадносін уласных сродкаў да крэдытных: 30/70, 40/60, 50/50;
- фінансавая падтрымка ў выглядзе штомесячнай выплаты прэміі дзяржавы па ўкладзе ў памеры 10% стаўкі рэфінансавання НБРБ (з улікам яе змянення) гадавых;
- прэмія дзяржавы і даходы ў выглядзе працэнтаў па ўкладзе вызваляюцца ад падаходнага падатку.
Галоўнае, што трэба ведаць аб новай сістэме будзберажэнняў:
- дагаворная сума — ад 40 да 300 тысяч рублёў;
- тэрмін пагашэння жыллёвага крэдыту ў залежнасці ад выбранага плана накаплення — 7, 10 і 15 гадоў адпаведна;
- працэнты па ўкладзе — стаўка рэфінансавання НБРБ, паменшаная на два працэнтныя пункты;
- * прэмія дзяржавы — 10% стаўкі рэфінансавання НБРБ гадавых;
- працэнт па крэдыце — стаўка рэфінансавання НБРБ, павялічаная на адзін працэнтны пункт.
Ва ўдзельнікаў праграмы з’явіцца магчымасць ажыццяўляць пераход з аднаго плана накаплення на іншы больш працяглы, адкрываць неабмежаваную колькасць укладаў, саступаць права патрабавання па дагаворы іншым фізічным асобам.
Больш дэталёвую інфармацыю аб новай дзяржаўнай сістэме будаўнічых зберажэнняў можна даведацца ў любым аддзяленні Беларусбанка, на сайце або па нумары 147.