Да Дня абароны дзяцей Беларусбанк сумесна з Ваеннай акадэміяй і кампаніямі-партнёрамі, якія спецыялізуюцца на пытаннях кібербяспекі, правялі свята «Мы побач! Мы разам!» для падапечных з 17 дзіцячых дамоў сямейнага тыпу, катэджы для якіх пабудаваў Беларусбанк у рамках праекта «Бацькоўскі кут».
Падобныя мерапрыемствы для банка шматгадовая традыцыя. Пачынаючы 17 гадоў таму сацыяльны праект «Бацькоўскі кут», каманда банка вырашыла, што будзе не проста дарыць дзецям дах над галавой, але і ўсяляк садзейнічаць іх сацыялізацыі і ўключэнню ў дарослае жыццё. Урокі фінансавай граматнасці і кібербяспекі таксама сталі добрай і карыснай традыцыяй.
А каб дзецям і іх бацькам было максімальна цікава і пазнавальна, месца і фармат мерапрыемства кожны год абнаўляецца. У мінулым падарожнічалі на Лінію Сталіна і наведвалі таварыскі матч футбольных зборных Беларусі і Расіі. Сёлета свята для 140 дзяцей ва ўзросце ад 8 да 17 гадоў прайшло на тэрыторыі Ваеннай акадэміі.
— Ужо 17 гадоў Беларусбанк рэалізуе праект «Бацькоўскі кут». І за гэты час пабудаваў 17 катэджаў для прыёмных сем’яў. Але наша задача не проста забяспечыць дзецям дах над галавой, але і дапамагчы ў сацыялізацыі. У гэтым дапамагаюць таксама грамадскія арганізацыі банка. Разам мы прывозім дзяцей і іх бацькоў у знакавыя месцы, праводзім заняткі па фінансавай і лічбавай граматнасці. Кожны год стараемся прыдумаць нешта новае і цікавае. У папярэднія гады вазілі дзяцей у музей гісторыі Вялікай Айчыннай вайны, на Лінію Сталіна і на футбольны матч. У гэтым — гаворым пра нацыянальную і інфармацыйную бяспеку на тэрыторыі Ваеннай акадэміі. Хочацца, каб дзеці адчувалі, што ў роднай дзяржаве, моцнай і выдатнай, яны пад надзейнай абаронай і акружаны ўвагай і клопатам, — расказала старшыня Аб’яднанай арганізацыі БСЖ банка Ала Райцэс.
Пра важнасць патрыятычнага выхавання падрастаючага пакалення і нацыянальную бяспеку дзецям расказаў палкоўнік Арцём Няверка, намеснік начальніка Акадэміі па вучэбнай працы:
— Мы з радасцю прынялі дзяцей у Ваеннай акадэміі, каб не проста арганізаваць свята, падарыць ўражанні, але і правесці свайго роду прафарыентацыйную працу. Магчыма, хтосьці з дзяцей паглядзеўшы, у якіх умовах і чым жывуць нашы курсанты, захоча прысвяціць сябе воінскай справе.
Аб лічбавай бяспецы з дзецьмі пагаварылі прадстаўнікі кампаній, якія спецыялізуюцца на кібербяспецы: Васілій Хіжны і Міхаіл Красніцкі.
Таксама ў рамках мерапрыемства ўдзельнікі азнаёміліся з матэрыяльна-тэхнічнай базай акадэміі, паглядзелі паказальныя выступленні курсантаў, паўдзельнічалі ў квізе «Якія прафесіі дапамагаюць абараняць лічбавы свет». А бацькі-выхавацелі ў гэты час размаўлялі з псіхолагам, спрабуючы лепш разабрацца, як не выгараць і будаваць эфектыўнае ўзаемадзеянне з падрастаючым пакаленнем.
— Вось ужо 15 гадоў я працую мамай у вялікай сям’і. І ўвесь гэты час нас падтрымлівае Беларусбанк і яго грамадскія арганізацыі. Не абышлося ніводнага навагодняга свята, ніводнай сустрэчы лета і пачатку навучальнага года без гэтай падтрымкі і падарункаў, — расказала Святлана Канаваленка, выхавацель.
Дарэчы, у гэтым годзе арганізацыя «Белая Русь» банка таксама падрыхтавала сюрпрыз для сем’яў — вялікія сучасныя турыстычныя палаткі. Святлана Канаваленка адзначыла, што падарунак вельмі дарэчы:
— Мы плануем адпачынак на Нарачы, хацелі купляць, але атрымалі вось такі своечасовы падарунак. Кажу дзякуй ад усіх мам і дзетак за падтрымку, дапамогу і любоў, якую мы адчуваем з боку банка.
Духмяная салдацкая каша і паходная кухня, магчымасць пасядзець у танку і пратэсціраваць кіраванне разведвальным дронам зрабілі мерапрыемства незабыўным і не падобным на папярэднія сустрэчы вялікай сям’і падапечных Беларусбанка.
Прыемны сюрпрыз ад Беларускага саюза жанчын — сапраўдны каравай —дастаўся прымаючаму боку: курсантам і афіцэрам Ваеннай акадэміі.
«Крута! Хачу паспрабаваць! Нічога сабе! Самы лепшы дзень у маім жыцці!» — гэта толькі некаторыя рэакцыі дзяцей на падзеі насычанага дня.
Упраўленне камунікацый, маркетынгу і рэкламы