Зламыснікі зноў выкарыстоўваюць далёка не новую, але па-ранейшаму актуальную схему падману інтэрнэт-карыстальнікаў. Сутнасць простая: пад выглядам фінансавых экспертаў, часам даволі рэальных людзей, або ад імя вядомых кампаній праз сацыяльныя сеткі, рэкламу і анлайн-аб’явы злачынцы распаўсюджваюць інфармацыю аб з’яўленні ўнікальнага спосабу выгадна ўкласці грошы (чым больш, тым лепш) і атрымаць велізарны прыбытак за найкарацейшы час.
Жадаючым інвесціраваць сродкі і хутка ўзбагаціцца прапануюць не толькі пералічыць грошы, але і адкрыць «брокерскіх рахунак» або «асабісты кабінет на гандлёвай пляцоўцы», устанавіўшы нейкі дадатак або зарэгістраваўшыся на пэўным сайце – там звычайна размяшчаецца інтэрфейс з візуалізацыяй, якая імітуе рост даходаў ад зробленых укладанняў.
Калі чалавек вырашае, што хоча вывесці «заробленыя» сродкі, то раптам сутыкаецца з праблемамі: яго пераконваюць, што правесці гэту аперацыю проста так нельга, існуюць нейкія цяжкасці, і патрабуюцца дадатковыя выдаткі. Падставы могуць быць розныя: аплата «страховак», «падаткаў», «паслуг юрыста» і да таго падобнае. У выпадках з асабліва незгаворлівымі інвестарамі ў ход ідуць нават пагрозы і шантаж. Такім чынам махляры спрабуюць атрымаць як мага больш грошай ад пацярпелага. Дасягшуўшы сваёй мэты, яны абрываюць усе сувязі: спыняюць зносіны, выдаляюць перапіску, блакіруюць нумары.
Каб прыцягнуць максімальна многа людзей, гатовых інвесціраваць, і ўсыпіць іх пільнасць, зламыснікі нярэдка ствараюць фэйкавыя сайты або размяшчаюць аб’явы, напрыклад, у сацыяльных сетках, на відэахостынгу YouTube і нават на сайтах знаёмстваў. Маюцца прыклады распаўсюджвання падробленых рэсурсаў ад імя буйных кампаній Беларусі і Расіі. Толькі за 2023 год зафіксаваны выпадкі выкарыстання ў афармленні такой рэкламы лагатыпаў і іншых элементаў фірменнага стылю ААТ «Газпрам трансгаз Беларусь», ААТ «Беларуськалій», ДВА «Белэнерга», ААТ «Беларусбанк» і іншых.
Таксама сустракаліся спробы падрабіць старонкі сайтаў папулярных навінавых рэсурсаў (onliner.by, www.belta.by), а таксама сюжэты дзяржаўных беларускіх і расійскіх тэлеканалаў.
Распазнаць ілжэброкера не так ужо складана, ёсць шэраг адметных прыкмет. Па-першае, адсутнічае ліцэнзія на брокерскую дзейнасць або яе сапраўднасць выклікае сумненні. Па-другое, вам не прапануюць аформіць адносіны афіцыйна і заключыць дагавор. Па-трэцяе, абяцанні занадта добрыя, каб быць праўдзівымі: высокая даходнасць абсалютна без рызык і за вельмі кароткі тэрмін. Па-чацвёртае, адбываецца відавочны прымус да ажыццяўлення здзелкі: грошы патрабуюць прама зараз, прычым перавесці іх трэба на рахунак або карту фізічнай асобы. Па-пятае, усё ўзаемадзеянне вядзецца выключна праз мэсэнджары, сацыяльныя сеткі або па тэлефоне, паколькі офіса няма.
Беларусбанк рэкамендуе: інвесціруйце толькі ў зразумелыя інструменты, не спяшайцеся з рашэннямі, успрымайце ўсе абяцанні крытычна. Залішне не давярайце рэкламе ў сацыяльных сетках. Не пераходзьце па незнаёмых спасылках, не ўводзьце там асабістыя даныя і рэквізіты банкаўскіх карт. Загружайце дадаткі толькі з афіцыйных платформ. З асцярогай стаўцеся да званкоў ад незнаёмых людзей з занадта прывабнымі прапановамі і спыняйце размову, як толькі ў вас з’явіліся сумненні. Беражыце сябе і свае фінансы. Для атрымання інфармацыі аб прадуктах і паслугах банка, а таксама тэхналагічных навінках карыстайцеся толькі афіцыйным сайтам банка, а таксама афіцыйнымі акаўнтамі ў сацыяльных сетках.