Цяпер не трэба будзе стаяць у чарзе за жэтонам або сутаргава шукаць у сумцы праязны. «Беларусбанк» знайшоў спосаб зэканоміць час пасажыраў пры аплаце паездкі ў метро.
Сёння банк прэзентаваў інавацыйны праект «Глядзі і праходзь». Сэрвіс дазволіць ажыццявіць аўтэнтыфікацыю пасажыраў і аплату праезду ў рэжыме рэальнага часу.
Спецыяльныя біяметрычныя тэрміналы плануецца ўстанавіць на кожнай станцыі метро. Каб здзейсніць аплату, пасажыру трэба будзе спампаваць дадатак М-банкінг «Беларусбанка», выбраць укладку «Глядзі і праходзь» і перад паездкай сфатаграфаваць свой твар. Лічбавы вобраз захаваецца на серверы без самога фотаздымка, і пры пераходзе праз тэрмінал біяметрычная сістэма счытае яго рысы, а з плацежнай карты, прывязанай да М-банкінгу, спішуцца грашовыя сродкі за праезд. Прайсці праз турнікет з дапамогай новай тэхналогіі можна будзе не больш чым за дзве секунды.
Зараз дадатак тэсціруецца супрацоўнікамі банка і метрапалітэна. Біяметрычны тэрмінал для гэтага быў устаноўлены на станцыі метро «Плошча Леніна».
Адзначым, што скарыстацца паслугай змогуць кліенты не толькі «Беларусбанка», але і іншых беларускіх банкаў. З дапамогай смс-банкінгу картку іншага банка можна дадаць у М-банкінг. Зрабіць гэта можна ў любым інфакіёску «Беларусбанка».
У цяперашні час тэхналогіі Face ID не прадугледжваюць ажыццяўленне аперацый аплаты ў рэжыме реальнага часу. Унікальнасць сэрвісу банка заключаецца ў адначасовым распазнаванні твару і ажыццяўленні плацяжу.
Сістэмы распазнавання твараў у метро выкарыстоўваюцца ў Кітаі і тэсціруюцца ў Расіі. Аднак у беларускай ёсць свая асаблівасць — адначасовае распазнаванне твару і ажыццяўленне плацяжу.
Намеснік старшыні Мінгарвыканкама Аляксандр Дараховіч адзначыў, што гарадскія ўлады задаволены супрацоўніцтвам з «Беларусбанкам», раней у супрацоўніцтве з банкам укаранёна сістэма аплаты праз смартфон у аўтобусах маршрутаў № 1 і № 100.
Па даных дырэктара ДП «Мінскі метрапалітэн» Уладзіміра Сотнікава, штогод сталічная падземка перавозіць прыблізна 300 млн чалавек, у суткі — каля 800 тыс.
Аддзел камунікацый