Колькасць устаноў агульнай сярэдняй адукацыі, якія супрацоўнічаюць з Беларусбанкам у рамках праекта па ўкараненні Карты навучэнца, пераадолела тысячную мяжу.
«Па стане на 1 красавіка да ініцыятывы далучылася 1001 навучальная ўстанова ў 335 населеных пунктах па ўсёй рэспубліцы. Сёння Карта навучэнца функцыянуе ў 199 адукацыйных установах Брэсцкай вобласці, 185 — Віцебскай, 174 — Гомельскай, 144 — Гродзенскай,158 — Мінскай і 141 — Магілёўскай. У названых установах адукацыі вучацца ў агульным больш за 630 тыс. дзяцей», — адзначыла намеснік старшыні праўлення Беларусбанка Святлана Кажэкіна.
Унікальнасць Карты навучэнца заключаецца ў яе шматфункцыянальнасці. З аднаго боку, гэта паўнавартасны плацежны сродак, з іншага — дакумент, які пацвярджае статус навучэнца. Таксама магчыма выкарыстанне Карты навучэнца як пропуску, у тым ліку электроннага, у навучальную ўстанову, што дазваляе клапаціцца пра бяспеку дзяцей. Акрамя таго, школьнікі могуць прад’яўляць Карту навучэнца ў грамадскім транспарце для пацвярджэння права на бясплатны праезд — гэтак жа сама, як і даведку. Гэта стала магчымым дзякуючы супрацоўніцтву Беларусбанка, органаў мясцовага самакіравання рэгіёнаў, Савета Міністраў і Міністэрства адукацыі.
Распрацоўка адзінага дызайну Карты навучэнца для школьнікаў усёй краіны — таксама вынік узаемадзеяння банка і міністэрства. Падрыхтаваны крэатыўнай камандай Беларусбанка праект візуала карткі атрымаў адабрэнне ведамства і лёг у аснову зацверджанай адзінай формы карты для школьнікаў усіх рэгіёнаў рэспублікі.
Упраўленне камунікацый, маркетынгу і рэкламы