Яркае і напоўненае глыбокім сэнсам мерапрыемства «Васільковы баль. АСБ» упершыню правёў Беларусбанк. Яно было прымеркавана да Дня народнага адзінства і накіравана на дапамогу падапечным Беларускай асацыяцыі дапамогі дзецям-інвалідам і маладым інвалідам.
— Сімвалічна, што мы праводзім баль напярэдадні Дня народнага адзінства, падкрэсліваючы тым самым агульнасць з нашымі кліентамі ў імкненні супрацоўнічаць на карысць тых, каму патрэбна дапамога, — адзначыў старшыня праўлення банка, член Савета Рэспублікі Віктар Ананіч.
Ідэйны натхняльнік мерапрыемства і старшыня Аб’яднанай арганізацыі Беларускага саюза жанчын банка Ала Райцэс падзялілася, што арганізатары натхняліся Прэзідэнцкім балем. Але пры гэтым вырашылі дадаць у мерапрыемства ўласную іскрыначку.
— Наш баль мае тры мэты: дапамагчы дзецям з абмежаванымі магчымасцямі, прадэманстраваць, што з карпаратыўнымі кліентамі мы не проста эканамічныя, але і сацыяльныя партнёры, бо дапамагаем дзецям разам. І нарэшце, дапамагчы нашым работнікам, маладым і ўжо вопытным, знайсці пару. Хто ведае, магчыма, пасля гэтага мерапрыемства народзіцца новая банкаўская сям’я. Бо на працягу некалькіх месяцаў танцавальныя партнёры праводзілі нямала часу разам, вучыліся рухацца, мелі стасункі ў нефармальных абставінах, знаёміліся. Як мне прызналіся некаторыя ўдзельнікі, гэта дазволіла зблізіцца і больш эфектыўна ўзаемадзейнічаць у рабочым плане. Мне здаецца, важна ствараць умовы, каб маладыя людзі знаёміліся і размаўлялі не ў сацсетках, а вось у такіх прыгожых і натхняльных залах, — падзялілася канцэпцыяй мерапрыемства А. Райцэс.
Старшыня Беларускай асацыяцыі дапамогі дзецям-інвалідам і маладым інвалідам Валянціна Бічыкава патлумачыла, што для спецыяльнага дабрачыннага аўкцыёну было выбрана па адным падапечным з кожнай вобласці, два з Гомельскай і Мінска.
— Вельмі хацелася здзейсніць іх невялікую мару. Гэта тыя сродкі рэабілітацыі, якія неабходны дзецям. Вядома, наша сацыяльна-арыентаваная дзяржава прадпрымае вельмі шмат крокаў, і мы ўносім нейкія прапановы для таго, каб у дзяцей і маладых людзей з інваліднасцю паляпшалася якасць жыцця. У сілу таго, што здароўе ў некаторых момантах не паправіць, хочацца сацыялізаваць іх, каб яны сябе камфортна адчувалі, — расказала кіраўнік аб’днання.
У кожнага з дзяцей спраўдзілася свая мара. Даміру Савончыку з Мінска выдзелілі сродкі на функцыянальны ложак, Мікіту Далжэўскаму з Бабруйска — на праграмнае забеспячэнне і прыстаўку для айтрэкінгу. Ганна Клявец са Смаргоні атрымала дзіцячую інвалідную каляску, Андрэй Бурдыс з Мінска — электратрыцыкл, а Аляксей Рагозін з Кобрына — электрычны пад’ёмнік.
Акрамя таго, здзейснілася мара Аляксандры Бурай з Барані аб інваліднай калясцы, Мікіты Лебедзева з вёскі Чэрнікаўшчына аб дзіцячай прагулачнай калясцы, Максіма Хадакоўскага з Мазыра — аб электрычным пад’ёмніку.
Ілля Акінчыц з Гомеля атрымаў крэсла-каляску, а браты Раман і Кірыл Корбуты з Мінска — спецыялізаваныя матрацы.
Мару апошніх споўніла намеснік дырэктара ААТ «Мінскі завод шасцерняў» Лілія Лазарэвіч. Яна нагадала, што мэтай мерапрыемства з’яўляецца папулярызацыя добрых спраў.
— Імі жыве чалавек. Людзі павінны імкнуцца іх рабіць. Ключавая задача грамадства — быць больш міласэрнымі адзін да аднаго і дапамагаць тым, хто ў гэтым мае патрэбу, — падзялілася меркаваннем яна.
Усяго ж да дабрачыннага аўкцыёну далучыліся 10 прадпрыемстваў — карпаратыўных кліентаў банка.
І пакуль кліенты выкуплялі лоты, кожны з якіх — мара канкрэтнага дзіцяці, 24 пары работнікаў і ветэранаў банка радавалі прысутных прыгожым і зладжаным выкананнем вальса, паланэза, падэпатынера.
Месяцы трэніровак не прайшлі дарма: ад адточаных плаўных рухаў госці балю не маглі адвесці поглядаў.
Ганаровы госць балю, міністр працы і сацыяльнай абароны Беларусі Наталля Паўлючэнка, нагадала, што такія танцавальныя вечары, балі прыйшлі да нас з мінулага:
— Выдатна, што мы цэнім гэта, што за гэтым напрамкам ёсць развіццё. І яшчэ адной традыцыяй беларусаў, вядома, з’яўляецца міласэрнасць, дабрачыннасць, дапамога тым, хто побач і хто ў ёй мае патрэбу. І тут мы таксама бачым, што традыцыі захоўваюцца.
Па словах міністра, праект дазволіў зрабіць жыццё дзяцей лепшым, а бацькоў — крыху лягчэйшым.
— Дзяржавай прадастаўляецца каласальная падтрымка сем’ям, дзецям, людзям з інваліднасцю, але гэта і дадатковая падтрымка не можа быць лішняй. Яна цэніцца, у першую чаргу, таму што мы ўсе разам бачым, што дзякуючы асабістаму намаганню можна зрабіць уклад у адну вялікую-вялікую справу, — звярнула ўвагу Наталля Паўлючэнка.
Дарэчы, дабрачынны баль, па словах кіраўніка банка Віктара Ананіча, стане традыцыйным. Як стала пастаяннай часткай добрых спраў падтрымка таленавітай мастачкі Марыі Прахаровіч, якая змагаецца з рэдкім і цяжкім захворваннем — спінальнай мышачнай атрафіяй. Банк не першы год падтрымлівае дзяўчыну, а сяброўства знайшло адлюстраванне ў карпаратыўным календары на 2025 год, у аснову якога ляглі яе карціны. Яны ж былі выстаўлены ў холе месца правядзення балю, каб любы жадаючы мог далучыцца яшчэ да адной добрай справы.
Упраўленне камунікацый, маркетынгу і рэкламы