Фінал інтэлектуальных гульняў «Вучыся. Зберагай. Зарабляй», арганізатарам якога з’яўляецца Беларусбанк, атрымаўся гарачым. Завяршаючае мерапрыемства Тыдня фінансавай граматнасці прайшло ў сталічным Палацы дзяцей і моладзі 21 сакавіка. Гучныя крыкі перамогі і воклічы расчаравання – так было на працягу ўсіх шасці тураў. Напружанне можна растлумачыць: за званне лідара змагаліся самыя эрудзіраваныя каманды з розных куткоў краіны.
Усяго галоўная маладзёжная пляцоўка рэспублікі сабрала больш за 140 юных знаўцаў. Для іх удзельнікі Клуба інтэлектуальных гульняў Беларусбанка «Плацінавая Сава» падрыхтавалі 42 каверзныя пытанні — ад эканомікі да геапалітыкі і 80-годдзя Вялікай Перамогі.
– У Беларусі асаблівая ўвага надаецца пытанню павышэння фінансавай граматнасці падрастаючага пакалення, не выключэнне наш банк. Толькі за мінулы год банкам праведзена каля 8,5 тысяч мерапрыемстваў – розных фарматаў і для розных узростаў. Тое, што вы знаходзіцеся тут, гаворыць аб тым, што вы годна прайшлі адборачныя этапы ў кожным са сваіх абласных гарадоў, і гатовы пазмагацца за званне самых фінансава граматных, – звярнуўся да ўдзельнікаў гульні дырэктар дэпартамента карпаратыўнай сацыяльнай адказнасці, камунікацый і маркетынгу Аляксей Кулік.
Ён нагадаў, што турнір «Вучыся. Зберагай. Зарабляй», ініцыятарам якога з’яўляецца Беларусбанк, праводзіцца з 2017 года. За гэты час у ім прынялі ўдзел больш за 4500 чалавек. І колькасць жадаючых праверыць свае сілы ў яркім інтэлектуальным спаборніцтве з кожным годам расце. На гэты турнір прыехалі 24 каманды, якія перамаглі ў адборачных этапах на ўзроўні абласцей.
Аляксей Кулік выказаў надзею, што падобныя турніры стануць крыніцай натхнення для дзяцей, і тыя захочуць прадоўжыць паглыбляць веды ў сферы эканомікі і фінансаў:
– Калі веды – вялікая сіла, то фінансавая граматнасць – свайго роду компас, які дапаможа ў рэалізацыі самых амбіцыёзных мэтаў. Будзем рады, калі ў будучым вы папоўніце рады шматтысячнага калектыву найбуйнейшага банка краіны.
Начальнік упраўлення культуры Мінгарвыканкама, кіраўнік праектнай дзейнасці грамадскай арганізацыі «Белая Русь» Віталій Брэль у сваю чаргу адзначыў, што знаходзіцца сярод будучых банкіраў і кіраўнікоў прадпрыемстваў яму асабліва прыемна.
– Сёння краіна можа быць спакойная за сваю будучыню. Вы – наша інтэлектуальная, фінансава граматная моладзь, – упэўнены Віталій Брэль.
«Белая Русь» вось ужо шмат гадоў выступае партнёрам і суарганізатарам турніру, які праводзіцца ў рамках глабальнай інфармацыйнай кампаніі па павышэнні дасведчанасці дзяцей і моладзі аб фінансах – Тыдня фінансавай граматнасці Global Money Week. У гэтым годзе галоўная тэма Тыдня – «Навядзі парадак у асабістых фінансах».
«Ну што, будзем наводзіць парадак у фінансах?» – задаў галоўнае пытанне вядучы турніру. Юныя інтэлектуалы гучна і дружна пракрычалі: «Так!».
Мяркуючы па тым, якія назвы выбіралі школьнікі для сваіх калектываў, бой павінен быў быць сур’ёзны. «Антыкапіталісты розуму», «Дывідэнды», «Нябачная рука», «Граматныя інвестары» і іншыя ўжо са старту былі гатовы змагацца за перамогу.
– «Навядзі парадак у асабістых фінансах» – гэта не пра тое, як зарабіць, а, хутчэй, пра тое, як быць руплівым гаспадаром. Разумець, чаго каштуюць грошы і правільна імі распараджацца, ведаць, якая небяспека пры выкарыстанні фінансавых інструментаў існуе, – выказаў меркаванне старшыня Клуба інтэлектуальных гульняў «Плацінавая Сава» Павел Панеўскі. – Таму наша задача – паказаць падрастаючаму пакаленню, наколькі важна арыентавацца ў эканамічнай тэматыцы і не трапляцца на хітрыкі махляроў.
За дзве гадзіны мазгавога штурму старшакласнікам прыйшлося ўспомніць не толькі працы Карла Маркса і Джона Мейнарда Кейнса, але і кодавую назву аднаго з этапаў «Рэйкавай вайны», імёны вялікіх казачнікаў свету і самыя паўночныя сталіцы Еўропы.
Што сабой сімвалізуе мядзведзь на біржавых таргах і як называецца рабро манеты, беспамылкова ведалі тры каманды – «BaOrg» гімназіі №36 г. Мінска, якая заняла 3-е месца; «Імя Джона Мейнарда Кейнса» сярэдняй школы № 9 г. Брэста імя А.Ф. Наганава, якая удастоілася ганаровага 2-га месца; і «Антыкапіталісты розуму» – юныя геніі з гімназіі №10 горада Маладзечна, якія ўзняліся на вышэйшую прыступку інтэлектуальнага п’едэстала.
Для пераможцаў дыплом першай ступені стаў сапраўдным сюрпрызам.
– Нам не было калі рыхтавацца – трэба было падцягваць «хвасты» і праводзіць розныя мерапрыемствы ў канцы чвэрці, – шчыра прызнаўся капітан каманды «Антыкапіталісты розуму» Максім Габруковіч. – Таму максімум, пра што мы марылі, – увайсці ў пяцёрку лідараў. Пасля першых трох тураў у нас з’явілася надзея на прызавое месца. Але пасля «правальнага» чацвёртага, дзе мы адказалі правільна толькі на два пытанні, нават гэтая думка сышла з галавы. І тут нечакана для ўсіх займаем першае месца. Эмоцыі проста перапаўняюць!
Дарэчы, падобныя спаборніцтвы знаўцаў для капітана каманды – не ў навінку. Васьмікласнік працяглы час займаецца ў клубе інтэлектуальных гульняў «Іскра» ў Маладзечне, а ў квізах удзельнічае ледзь не з нараджэння.
– Калі я быў зусім маленькі, мяне не было з кім пакінуць. Таму бацькі часта бралі з сабой на квізы «Мазгабойня». Так і вырас, – усміхнуўся адораны хлопец.
Камандам-прызёрам турніру «Вучыся. Зберагай. Зарабляй» уручылі памятныя падарункі ад Беларусбанка і партнёраў гульні.
Упраўленне камунікацый, маркетынгу і рэкламы