Спартсмены і аматары бегу з усёй краіны не спалохаліся зімовага надвор’я і сабраліся ў нядзелю, 17 снежня, у Нацыянальнай бібліятэцы. Ім трэба было на час узабрацца на аглядную пляцоўку «алмаза», пераадолеўшы 23 паверхі, або 591 прыступку.
У гэтым годзе дабрачыннае мерапрыемства сабрала рэкордную колькасць удзельнікаў — 401. Ініцыятарам і арганізатарам праекта ўжо пяты раз выступае Беларусбанк, тэхнічным арганізатарам — Федэрацыя прыгодніцкіх гонак.
У забегу прынялі ўдзел дзеці і дарослыя. Самай малодшай спартсменцы было ўсяго 4 гады, а самаму старэйшаму — 80 гадоў. Некаторыя прыйшлі на спаборніцтва ў яркай форме, а хтосьці нават прадумаў канцэпцыю сямейных касцюмаў.
Удзельнікаў вертыкальнага забегу вітаў начальнік упраўлення камунікацый і карпаратыўнай сацыяльнай адказнасці Беларусбанка Аляксей Кулік. Ён адзначыў, што сабраныя з узносаў сродкі пойдуць на дапамогу дзецям:
— Думаю, прысутным тут прыемна ўсведамляць, што сёння яны не проста стануць часткай цікавага спартыўнага спаборніцтва, але і дапамогуць здарыцца навагодняму цуду для выхаванцаў Бягомльскай дапаможнай школы-інтэрната. Самая вялікая ўзнагарода — разумець, што наша з вамі падтрымка робіць крыху больш шчаслівымі тых, каму гэта больш за ўсё неабходна.
Спаборніцтва традыцыйна прайшло ў некалькіх катэгорыях: «юнакі» і «дзяўчаты», «юніёры» і «юніёркі», «дарослыя» і «майстры» сярод мужчын і жанчын. Кожны ўдзельнік атрымаў памятны медаль на фінішы, а спартсменам з найлепшымі вынікамі арганізатары ўручылі падарункі ад Беларусбанка і партнёраў мерапрыемства.
Лідарам у абсалютным заліку ў мужчынскай гонцы стаў Аляксей Мардас, яго час — 2 мінуты роўна. Сярод жанчын найлепшы час паказала Святлана Мартысевіч з вынікам 2 мінуты 15 секунд.
Аддзел камунікацый і рэкламы