Найбуйнейшы банк краіны ў рамках дабрачыннага праекта «Бацькоўскі кут» перадаў дзіцячы дом сямейнага тыпу ў Верхнядзвінску, які стаў ужо 17-м у краіне і трэцім у Віцебскай вобласці. Напярэдадні Новага года ў новае жыллё засялілася сям’я Таісіі Міклушонак, якая выхоўвае семярых дзетак. Новы дом пабудавалі ўсяго за паўгода. Вынік сапраўды ўражвае. Гэта адзін з самых вялікіх катэджаў, пабудаваных па сацыяльнай праграме банка.
Усяго памяшканне налічвае 11 пакояў, у якіх з камфортам могуць размясціцца дзеці. Ёсць усё неабходнае для паўнавартаснага жыцця: некалькі ванных пакояў, прасторная кухня і нават невялікі спартыўны куток, дзе дзеці могуць займацца фізкультурай. Прадугледжаны і працоўны кабінет, дзе дзеці будуць выконваць дамашнія заданні.
«У 1998 годзе Прэзідэнт нашай краіны Аляксандр Лукашэнка зацвердзіў праграму «Дзеці Беларусі», ідэя якой заключаецца ў тым, каб кожнае дзіця выхоўвалася ў сям’і, - адзначыў на цырымоніі адкрыцця катэджа член Савета Рэспублікі, старшыня праўлення банка Віктар Ананіч. – І «Беларусбанк» ужо больш за 10 гадоў, рэалізуючы праект «Бацькоўскі кут», уносіць свой уклад у вырашэнне гэтай задачы».
На плошчы больш чым 300 квадратных метраў размешчаны больш за дзясятак пакояў і прасторная тэраса, на двары абсталявана дзіцячая пляцоўка. У прыёмнай сям’і выхоўваецца сямёра дзяцей: пяцёра хлопчыкаў і дзве дзяўчынкі.
Уручаючы ключы ад дома Таісіі Міклушонак, Віктар Ананіч выказаў упэўненасць, што нягледзячы на тое, што расціць іх будзе толькі мама, яе мудрасці, цярпення, любові і клопату хопіць, каб прывіць усім дзецям галоўныя сямейныя каштоўнасці і выхаваць сапраўдных грамадзян і патрыётаў сваёй краіны.
У сваю чаргу старшыня Віцебскага аблвыканкама Аляксандр Субоцін падзякаваў кіраўніцтву «Беларусбанка» за рэалізацыю праекта «Бацькоўскі кут».
- «Сёння сапраўды стала крыху святлей і з’явілася крыху больш дабрыні. Гэтыя дзеці, якія раней туліліся ў невялічкім доме, атрымалі такі камфортны катэдж. Хацелася б сказаць вялікі дзякуй маме Таісіі, якая аддае гэтым дзеткам сваю любоў і энергію. Я так разумею, што ў будучым сям’я можа стаць яшчэ большай», - падкрэсліў губернатар рэгіёна.
Несумненна, самыя яркія эмоцыі адчулі навасельцы. Цяпер у кожнага дзіцяці будзе свой пакой, месца для зацішку. Па словах Таісіі Аляксандраўны, гэта нават не дом, а цэлая сядзіба. Ёсць і камп’ютарны кабінет, дзе можна зрабіць урокі і пазаймацца. Самае галоўнае для гаспадыні – гэта вялікая і прасторная кухня, дзе вялікая і дружная сям’я можа лёгка змясціцца.
Галоўная задача бацькоў-выхавацеляў, па словах жанчыны, вырасціць дзяцей добрымі, спагадлівымі і справядлівымі людзьмі.
Павіншаваў дзяцей з надыходзячымі навагоднімі святамі і Дзед Мароз, уручыўшы дзеткам салодкія падарункі. Начальнік Віцебскага абласнога ўпраўлення №200 Аляксандр Лапаткін з нагоды наваселля перадаў сям’і Міклушонак спартыўны інвентар.
Дзеці дзяліліся сваімі ўражаннямі ад прасторнай хаты з гасцямі і падзякавалі за такі падарунак пад Новы год.
Аддзел камунікацый і рэкламы