Пластыкавая картка эканоміць час і грошы ("Звязда", 26.06.2008)

Сёння пластыкавыя банкаўскія карткі становяцца ўніверсальным плацёжным інструментам, а безнаяўны разлік усё больш дамінуе. ААТ "ААБ Беларусбанк" больш за 12 гадоў з'яўляецца ўдзельнікам рынку пластыкавых банкаўскіх картак. Агульная колькасць выпушчаных "Беларусбанкам" картак на пачатак чэрвеня гэтага года склала 2,8 мільёны, а гэта 54 працэнты ад агульнай колькасці картак, выпушчаных банкамі на тэрыторыі нашай краіны. Як расказаў дырэктар разліковага цэнтра пластыкавых картак ААТ "ААБ Беларусбанк" Анатоль Багавік, кожны другі працуючы ў нашай краіне атрымлівае зарплату на пластыкавых картках, іх  выкарыстоўвае 17 тысяч прадпрыемстваў. Да канца года колькасць банкаматаў павялічыцца на 77 адзінак, інфакіёскаў -- на 294.

Паступова пашыраецца кола трымальнікаў пластыкавых картак, у тым ліку і за кошт людзей пенсійнага ўзросту. Для іх прызначаны карткі "Беларусбанка" VISA Electron з павышаным працэнтам, роўным працэнту па ўкладу "Пенсійны". З сакавіка "Беларусбанк" пачаў выпуск міжнародных картак VISA Electron для жанчын з асаблівым дызайнам, якія дазваляюць атрымаць скідкі падчас аплаты тавараў і паслуг. У чэрвені банк прыступіў да выпуску картак са спартыўным дызайнам, прымеркаваным да Алімпійскіх гульняў у Пекіне і Году здароўя. Іх тыраж -- 29 тысяч (адпаведна 29-м Алімпійскім гульням). Тварам гэтага праекту стала васьміразовая чэмпіёнка свету па веласпорту Наталля Цылінская, якая сярод астатніх спартсменаў прадставіць Беларусь у Пекіне. Дарэчы, як паведаміла рэгіянальны менеджар па краінах СНД VISA International Святлана Геарбелідзэ, у Пекіне падчас Алімпійскіх гульняў да аплаты будзе прымацца толькі карты ў сістэме VISA.

Усё больш шырокае выкарыстанне атрымліваюць крэдыты па пластыкавых картках -- іх колькасць сёння ў параўнанні з 2006 годам узрасла ў 5 разоў, зараз "Беларусбанкам" выпушчана больш за 110 тысяч крэдытных картак. Пашыраецца і інфраструктура іх выкарыстання: на пачатак чэрвеня сетка абслугоўвання трымальнікаў пластыкавых картак складалася з 879 банкаматаў, 1649 пунктаў выдачы наяўных сродкаў, 1186 пунктаў прыёму камунальных плацяжоў, 3234 арганізацыі гандлю і сэрвісу, якія прымаюць да аплаты безнаяўныя сродкі.

Паступова ўсё больш шырокім становіцца і спектр паслуг, якія можна аплаціць пластыкавай карткай: гэта і паслугі сотавых аператараў, камунальныя плацяжы, а таксама аплата за газ і электраэнергію, аплата спадарожнікавага тэлебачання і паслуг некаторых Інтэрнет-правайдараў. У гэтыя дні падпісваецца дагавор з "Мінскводаканалам", пасля чаго з'явіцца магчымасць аплаты усяго спектру камунальных паслуг па безнаяўнаму разліку.

У маі "Беларусбанк" увёў 900-ты інфакіёск. Такія ўніверсальныя прыстасаванні банкаўскага самаабслугоўвання дазваляюць без дапамогі банкаўскіх работнікаў ажыццяўляць безнаяўныя аперацыі: аплату тых жа камунальных паслуг, мабільнага і хатняга тэлефона, паслугі аховы, пагашаць крэдыт. Акрамя таго, з'яўляюцца магчымасці набыцця па пластыкавых картках чыгуначных білетаў і білетаў на аўтобусныя маршруты міжгародніх і прыгарадных зносінаў. У інфакіёсках большасці гарадоў можна ўнесці і падатак на зямлю, і аплату за дзіцячы сад -- адзіны асабовы рахунак аб'ядноўвае інфармацыю па кожнаму плацельшчыку. У чэрвені з'явіцца яшчэ адна новая паслуга "М-банк" -- карыстальніцкі інтэфэйс, які ўстанаўліваецца на мабільны тэлефон (інфакіёск на мабільным тэлефоне). У чэрвені з'явіліся ў інфакіёсках новыя магчымасці -- пералічваць грашовыя сродкі з карт-рахунка на ўкладны рахунак, адкрыты ў банку. З выкарыстаннем пластыкавай карткі і мабільнага тэлефана ў інфакіёсках можна зарэгістраваць паслугу SMS-банкінг, якая дазваляе ажыццяўляць шэраг аперацый шляхам адпраўкі SMS-паведамленняў. Зараз падпісчыкамі гэтай паслугі з'яўляецца больш за 260 тысяч трымальнікаў пластыкавых картак. У чэрвені "Беларусбанк" пашырыў функцыянальнасць SMS-банкінгу. Цяпер з яе дапамогай у выніку страты пластыкавай карткі можна аператыўна яе заблакіраваць, адправіўшы SMS  належнага фармату.

З 1 мая па 15 чэрвеня ў краіне праходзіла рэкламная гульня "З карткай VISA "Беларусбанка -- на Алімпійскія гульні ў Пекін". Трымальнік карткі VISA, які аплаціў пакупку ў таргова-сэрвісным прадпрыемстве на суму больш за 25 000 рублёў, аўтаматычна станавіўся ўдзельнікам акцыі і атрымліваў шанс выйграць паездку ў Пекін. Акрамя таго, разыгрываліся 100 дадатковых грашовых прызоў па 300 тысяч рублёў. Пуцёўку на дваіх на Алімпійскія гульні ў Пекіне выйграла выкладчыца аднаго з прыватных ВНУ сталіцы Вольга Казлоўская.