СМІ пра банк
26.01.2012

Тыя, хто ўзяў крэдыт раней, будуць дакрэдытаваны на старых умовах («Звязда» 26 студзеня 2012 года)

Пра гэта ўчора на прэс-канферэнцыі заявіў старшыня праўлення ААТ "ААБ Беларусбанк" Сяргей Пісарык.

Год цяжкі, але з задачамі справіліся

- На мой погляд, яшчэ ў нашай гісторыі не было такога перыяду, каб адначасова склалася столькі негатыўных момантаў, - пачаў размову з журналістамі кіраўнік Беларусбанка. - Але цяжкасці мінулага года нас толькі стымулявалі на аптымізацыю працы. Доля нашага банка ў прыросце крэдытаў у банкаўскай сістэме за 2011 год склала амаль 50% (пры ўмове, што ў краіне 31 банк). Гэта гаворыць аб месцы банка ў эканоміцы Беларусі. На сёння мы выдалі на крэдытаванне фізічных асоб 22 трыльёны рублёў. Праграма мінулага года банкам выканана на 100%. З пачатку рэалізацыі дзяржпраграмы па крэдытаванні будаўніцтва жылля з дапамогай крэдытаў банка было пабудавана амаль 326 тысяч кватэр, ці амаль 23 мільёны квадратных метраў жылля. Сёлета на гэтыя мэты з удзелам ільготных і асабістых рэсурсаў будзе накіравана амаль 6 трыльёнаў 400 мільярдаў рублёў.

 Аб указе Прэзідэнта №13

Аднак размова аб крэдытаванні насельніцтва на будаўніцтва жылля не магла не закрануць новы Указ Прэзідэнта №13 ад 6 студзеня 2012 года "Аб некаторых пытаннях прадастаўлення грамадзянам дзяржаўнай падтрымкі пры будаўніцтве (рэканструяванні) ці набыцці жылых памяшканняў".

- Учора ў прэм'ер-міністра была чарговая нарада, якая якраз займалася сумяшчэннем новага ўказа з раней прынятымі дакументамі. Таму праз пэўны час стане зразумела ўсім, хто, калі і на якіх умовах зможа скарыстацца з дзяржаўнай падтрымкі, - тлумачыць Сяргей Пісарык.

Але найбольш цікавіць, што будзе з тымі, хто ўжо ўзяў крэдыты. На гэтае пытанне прадстаўнік Беларусбанка адказаў наступнае: "Усе тыя людзі, якія заключылі крэдытную дамову з банкам, будуць дакрэдытаваны на старых умовах, але адбудуцца і пэўныя змяненні. Калі я вам зараз скажу, якія, гэта яшчэ больш унясе непаразуменняў. Давайце пакуль пачакаем". Таксама ён падкрэсліў, што Беларусбанк гатовы працаваць па новым указе. "Што ж тычыцца людзей, якія яшчэ не заключылі дамову, - працягнуў старшыня найбуйнейшага банка краіны, - то на выверку ўсіх спісаў даецца яшчэ адзін месяц: на прадмет адпаведнасці і неадпаведнасці прынцыпам і нормам, якія закладзены ва ўказе. Таму выканкамам яшчэ трэба зрабіць новыя спісы. Праз гэта сёння яшчэ не даюць крэдытаў, бо тыя спісы не выпраўлены".

Дарэчы, банкаўскія стаўкі, па словах старшыні праўлення, будуць зніжацца ў новым годзе пры ўмове змяншэння інфляцыі.

 Аб продажы акцый банка і іншым

Сяргей Пісарык патлумачыў, чаму цягнуць з размяшчэннем еўрабондаў: "Усё будзе залежыць ад умоў. Мы маглі б выйсці і летась, але цана прыцягнення нас не задавальняе". Атрымалі журналісты адказ і на пытанне наконт магчымага продажу пакета акцый Беларусбанка, пра што неяк ужо хадзілі чуткі. "Продаж пакета акцый банка рэальны. Але мы павінны разумець, што сёння як банку, так і краіне патрэбны не толькі грошы, але і новыя тэхналогіі, а таксама выразныя і зразумелыя, а самае галоўнае, прымальныя для краіны мэты таго інвестара, які прыйдзе", - заявіў кіраўнік банка.

Некалькі слоў было сказана аб сетцы Беларусбанка. Усім знаёмыя вялікія чэргі ў аддзяленнях падчас прыёму камунальных і іншых плацяжоў. "Мы не можам проста фізічна паўсюль забяспечыць неабходную колькасць персаналу ў "дні-пік" прыёму плацяжоў. Няхай нас людзі зразумеюць, - папрасіў Сяргей Пісарык. - Мы працуем над тым, каб усе масавыя плацяжы перавесці ў сістэму дыстанцыйнага кіравання. Інфраструктура для гэтага зроблена, засталося прывучыць да гэтага людзей".

 

Уладзіслаў КУЛЕЦКІ.

«Звязда» 26 студзеня, чацвер, 2012 года