Жыццё банка
18.03.2016

Пераадолець «кнопачны бар’ер». У галаўным офісе акцыянеры «Беларусбанка» асвойвалі каналы ДБА

Заняткі па фінансавай граматнасці па карыстанні ўстройствамі самаабслугоўвання і Інтэрнэт-банкінгам для акцыянераў «Беларусбанка» прайшлі ў Галаўным офісе. Тэмай навучальнага мерапрыемства сталі каналы дыстанцыйнага банкаўскага абслугоўвання, асвоіць якія акцыянерам дапамагалі вопытныя спецыялісты. Інфакіёск, АРІП, Аўтааплата, Інтэрнэт-банкінг – такія новыя для акцыянераў, большасць з якіх пенсіённага ўзросту, словы. Пераадолець «кнопачны бар’ер» і дапамагчы пазбавіцца ад страху перад сучаснымі тэхналогіямі – такую задачу паставілі перад сабой арганізатары мерапрыемства. 

 image002

Дарэчы, на працягу ўсёй сустрэчы акцыянеры не пераставалі здзіўляцца: па-першае, таму, наколькі шырокія магчымасці ў сучасных устройстваў і інтэрнэт-сэрвісаў, а па-другое, як усё, аказваецца, проста! Слухаючы размову спецыяліста аб перавагах паслугі «Аўтааплата», дзякуючы якой можна не турбавацца, што мабільны тэлефон будзе адключаны за несвоечасовае папаўненне балансу, адна з удзельніц мерапрыемства здзіўлена адзначыла: «Як шкада, што я раней усім гэтым не карысталася! Асвою інфакіёск і Інтэрнэт-банкінг і магу ўвогуле не хадзіць у аддзяленне. Ды і ўклад змагу папаўняць з карткі праз інтэрнэт. І не толькі рублёвы. Гэта ж колькі часу я зэканомлю?!»

 image004

Канешне, самай актуальнай для пажылых людзей была тэма аплаты камунальных плацяжоў праз сістэму АРІП. Многіх уразіў той факт, што можна адзін раз увесці неабходныя даныя, захаваць – і ўсё, у будучым будзе дастаткова проста ўносіць паказчыкі лічыльніка, незалежна ад спосабу ажыццяўлення плацяжу (інфакіёск, Інтэрнэт-банкінг). База даных сістэмы «Разлік» з’яўляецца адзінай для ўсіх каналаў, з дапамогай якіх ажыццяўляецца прыём плацяжоў, будзь то інфакіёск банка ці Інтэрнэт-банкінг.

 image006

У канцы мерапрыемства ўжо не спецыялісты банка, а самі акцыянеры тлумачылі адзін аднаму перавагі безнаяўных разлікаў і наракалі толькі на тое, што не рашыліся на такую форму аплаты і ўзаемадзеяння з банкам раней, абменьваліся ўражаннямі і пакідалі банк з цвёрдым намерам падключыць Інтэрнэт-банкінг у найбліжэйшым да дома аддзяленні.

 image008

ААТ «ААБ Беларусбанк» як найбуйнейшая фінансавая ўстанова краіны з 2012 года актыўна працуе з існуючымі і будучымі кліентамі ў накірунку фінансавай граматнасці.

Гэтай работай ахоплены розныя ўзроставыя групы.

Для дзяцей, школьнікаў і студэнтаў праводзяцца навучальныя мерапрыемствы сумесна з установамі адукацыі: адкрытыя ўрокі, дзелавыя гульні, экскурсіі ў музей ашчаднай справы банка і аперацыйныя залы, тэатралізаваныя пастановы, тэматычныя выставы, алімпіяды і конкурсы.

Кліенты пеніённага (старэйшага) узросту з задавальненнем наведваюць школы і ўніверсітэты залатога ўзросту, арганізаваныя на базе буйных аддзяленняў і аперацыйных служб банка, у бібліятэках, клубах, сумесна з тэрытарыяльнымі цэнтрамі сацыяльнага абслугоўвання насельніцтва і аддзеламі па працы і сацыяльнай абароне. Больш за 14 тысяч чалавек з ліку кліентаў сталага ўзросту ў 2015 годзе прайшлі навучанне сучасным  формам разлікаў і фінансавае кансультаванне.

Дарослае насельніцтва краіны актыўна вучыцца фінансавай грамаце па месцы працы – у арганізацыях і на прадпрыемствах. Так, для нашых кліентаў рэгулярна арганізоўваюцца масавыя прэзентацыі, Дні кліента, кансультацыі і аказанне практычнай дапамогі, стаў паспяховым сумесны праект з Белкарт «Чароўная карта».

Усяго ў 2015 годзе «Беларусбанкам» праведзена больш за 12 тысяч мерапрыемстваў па фінансавай граматнасці, у якіх прынялі ўдзел каля 405 тысяч чалавек.