Жыццё банка
08.05.2015

У «Беларусбанку» адбыўся фестываль «Факел Памяці» (прэс-рэліз)

{gallery_30584}

Фінальны тур Рэспубліканскага фестывалю сучаснай песні і паэзіі «Факел Памяці», прысвечанага 70-й гадавіне Вялікай Перамогі, адбыўся ў Цэнтральным офісе ААТ «ААБ Беларусбанк». У Мінск з усіх рэгіёнаў краіны прыбылі лепшыя спевакі і чытальнікі.

Адкрываючы фестываль, старшыня праўлення банка Сяргей Пісарык адзначыў важнасць падобных праектаў для маладых пакаленняў, якія, на шчасце, не ведаюць жахаў вайны.

«70 год наша краіна жыве пад мірным небам. Мы працуем, будуем, нараджаем дзяцей, вырошчваем хлеб, марым… А яшчэ пішам вершы і спяваем песні на роднай мове. І гэта так важна. Такая звычайная каштоўнасць, якую ў нас спрабавалі забраць. Прычым, разам з правам жыць, працягваць род, існаваць як нацыя, як народ», — падкрэсліў кіраўнік.

«Па ўсёй краіне пракацілася творчая хваля, якая на сваім грэбні ўзняла ўсіх неабыякавых і творчых работнікаў нашага банка. Кожны філіял, кожны цэнтр банкаўскіх паслуг прадэманстраваў найвышэйшы ўзровень падрыхтоўкі да фестывалю, — адзначыла старшыня Аб’яднанай прафсаюзнай арганізацыі банка Наталля Петрачкова. — Адборачныя туры ў абласцях сталі салютам з песень і вершаў, сапраўдным факелам памяці подзвігу нашых прадзедаў, якія адстаялі мір на зямлі».

Дыпломы лаўрэатаў атрымалі ўсе ўдзельнікі фінальнага тура. Былі вызначаны таксама лепшыя калектывы па намінацыях: «За лепшае асвятленне тэмы», «За высокае выканаўчае майстэрства», «Лепшая рэжысура канцэртнай праграмы», «Лепшы сцэнарый канцэртнай праграмы», «Сузор’е талентаў», «Лепшае відэаафармленне канцэртнай праграмы», «За захаванне нацыяальных традыцый».

Завершыўся канцэрт легендарнай песняй «Дзень Перамогі», якую разам з Заслужаным артыстам Рэспублікі Беларусь Аляксеем Ісаевым спявала ўся зала.

Прэс-служба ААТ «ААБ Беларусбанк»