Жыццё банка
09.09.2013

Сямейнае свята ў банку

{gallery_29237}

 

Мінула крыху больш за год з апошняй сустрэчы, і вось 7 верасня 2013 года «Беларусбанк» зноў прымаў дарагіх гасцей - сем'і, якія пражываюць у катэджах, пабудаваных банкам для дзіцячых дамоў сямейнага тыпу. Прыемна адзначыць, што за гэты кароткі час на 2 сям'і стала больш - ужо 11! І выхоўваюцца ў іх 105 дзяўчынак і хлопчыкаў.

У прасторным фае новага офіса ў гэты вераснёўскі дзень было асабліва сонечна ад дзіцячых усмешак і зіхатлівых вачэй. Банк падрыхтаваў для дзяцей і іх бацькоў сапраўднае свята. Ля ўваходу іх сустракалі прадстаўнікі «Белай Русі» і ўручалі сцяжкі.

Далей дзеці разам з бацькамі завіталі ў музей.

Пасля экскурсіі хуткасныя вялікія ліфты імгненна паднялі гасцей на паверх вышэй, дзе ў кафэ былі накрыты сталы са смачным абедам. А потым ізноў у ліфт - і на 5-ы паверх, у актавую залу.

Тут дзецям, з улікам узросту і інтарэсаў, былі прапанаваны забавы: камп'ютарныя гульні на фінансавую граматнасць, прагляд мультфільмаў, самыя творчыя спрабавалі сябе ў маляванні. На століках для малявання ляжалі карткі з тлумачэннем банкаўскіх і эканамічных паняццяў. Пазнаёміцца з банкам, даведацца, як ён працуе, дзецям дапамагалі супрацоўнікі-кансультанты.

А ў хуткім часе іх запрасілі ў актавую залу. Святочную праграму адкрыў музычны калектыў «Напалі». Вялікі экран упрыгожваў яркі першавераснёўскі малюнак - бо сустрэчу з сем'ямі банк прымеркаваў да пачатку навучальнага года. Але вось яго змянілі іншыя кадры: фільм знаёміў з кожнай сям'ёй, расказваў пра дзяцей і бацькоў, інтарэсы і захапленні сям'яў.

Ад імя кіраўніцтва банка прысутных у зале вітаў Уладзімір Занько, намеснік Старшыні Праўлення.

Ён адзначыў, што банк пазіцыяніруе свой бізнес як сацыяльна адказны. Будаўніцтва катэджаў для дамоў сямейнага тыпу і падтрымка шматдзетных сем'яў - адзін з многіх накірункаў дзейнасці банка ў гэтым напрамку. У найбліжэйшых планах - будаўніцтва яшчэ 4 такіх дамоў. «Сёння вы пабывалі ў новым будынку банка, - звярнуўся ён да дзяцей і дарослых, - больш даведаліся, чым жыве банк, як ён працуе. Мы вас лічым часткай нашай вялікай банкаўскай сям'і і спадзяемся, што вы будзеце добра вучыцца, атрымаеце адукацыю і прыйдзеце ў банк працаваць».

А каб лягчэй было ў вучобе, дзеці атрымалі ў падарунак электронныя кнігі і планшэты, дыскі і флэшкарты з матэрыяламі па фінансавай граматнасці, самыя маленькія - развіваючыя гульні і многае іншае. Першакласнікам - іх аказалася11 дзяўчынак і хлопчыкаў - ад Аб'яднанай прафсаюзнай арганізацыі банка старшыня прафкама ЦА Валянціна Кастэнка і старшыня прафкама філіяла № 529 «Белсувязь» Наталля Стасевіч уручылі партфелі са школьнымі прыладамі.

«Сустрэчы з сем'ямі, якія пражываюць у пабудаваных банкам дамах, з'яўляюцца традыцыяй. Банк удзельнічае ў іх жыцці, сем'і знаходзяцца пад апекай і непасрэдна нашай грамадскай арганізацыі», - адзначыў Валерый Казлоў.

Пацвярджэнне таму і гэта сустрэча, ініцыяваная грамадскім аб'яднаннем «Белая Русь» «Беларусбанка». За кошт сродкаў ад членскіх узносаў былі набыты электронныя планшэты, сабраны заплечнікі для кожнага дзіцяці, набыты білеты ў цырк, заказаны абед.

Пасля агульнага фота на памяць у фае банка сем'і адправіліся ў цырк. Праграма аўстралійскага цырку «Чарадзейства на лёдзе» стала цудоўным акордам гэтага дня. Ён запомніцца дзецям і бацькам надоўга.