Інтэрв'ю з кіраўніком
20.05.2015

Мільярды для эканомікі краіны


«Беларусбанк» актыўна супрацоўнічае з шэрагам банкаў і фінансавых кампаній з 17 краін свету. Доля знешняга фінансавання ў валютных пасівах банка складае 22% .
Арыентаванасць бізнесу на знешнія рынкі і дваццацігадовая бездакорная крэдытная гісторыя дазволілі сфарміраваць міжнародны брэнд. Сведчанне даверу замежных дзелавых партнёраў – прыцягненне ў нацыянальную эканоміку значных кароткатэрміновых і доўгатэрміновых замежных рэсурсаў. Іх аб’ём у мінулым годзе перавысіў 3,5 млрд. долараў ЗША ў эквіваленце.
Што характэрна, развіццё міжнароднага бізнесу банка – гэта не толькі колькасныя паказчыкі, але і якасць адносін, калі гарантам па яго абавязацельствах выступае ўрад замежнай дзяржавы.
Пра міжнародны напрамак бізнесу мы гаворым са старшынёй праўлення ААТ «ААБ Беларусбанк» Сяргеем Пісарыкам.

 

- Сяргей Паўлавіч, днямі ў Вене адбылося падпісанне пагаднення з Аўстрыйскім Кантрольным банкам. Як Вы ацэньваеце яго значнасць?
- Ацэньваю як высокі міжнародны давер «Беларусбанку». Упершыню для нашай банкаўскай сістэмы гарантам прадастаўляемага нам крэдыту на фінансаванне экспартна-імпартных здзелак выступіла Міністэрства фінансаў Аўстрыі. Гэта значыць, урад прадастаўляе гарантыі замежнаму банку. Гэта выключны, беспрэцэдэнтны выпадак. Для нас гэта пагадненне – выхад на новы ўзровень адносін у сферы міжнароднага бізнесу.
У цэлым, рэалізацыя гэтай здзелкі з аўстрыйскім банкам будзе садзейнічаць далейшаму ўмацаванню і развіццю двухбаковага супрацоўніцтва паміж нашымі краінамі. Прыемна, што амаль у той жа час, калі мы ў Вене падпісвалі дагавор, у Мінску крокі па далейшым развіцці ўзаемнага супрацоўніцтва абмяркоўваліся з федэральным міністрам па пытаннях Еўропы, інтэграцыі і замежных спраў Аўстрыйскай Рэспублікі Себасціянам Курцам.
Пагадненне дэбютнае, але спадзяюся, што падобныя здзелкі будуць і надалей мець месца.


- Нягледзячы на не самую лепшую сітуацыю на сусветным фінансавым рынку, вынікам мінулага года для «Беларусбанка» стала ўмацаванне пазіцый не толькі ў Рэспубліцы Беларусь, але і за мяжой, аб чым сведчаць лічбы. Якія фактары садзейнічалі развіццю міжнароднага напрамку банкаўскага бізнесу?
- Перш за ўсё, статус надзейнага дзелавога партнёра. Бо гэта адзін з асноўных фактараў поспеху любога бізнесу. Сваю ролю адыграла і вызначэнне міжнароднага вектару ў якасці прыярытэту. А гэта шырокі спектр прадуктаў у галіне гандлёвага, звязанага фінансавання, дакументарных аперацый, экспартнага і перадэкспартнага крэдытавання ва ўзаемадзеянні са страхавымі кампаніямі. Мы таксама аказваем садзеянне ў правядзенні дзелавых сустрэч, прэзентацый, кансультацый, як у Беларусі, так і за яе межамі. Так, часам прыходзіцца ламаць стэрэатыпы ўспрыняцця прадстаўнікамі замежных банкаў нашай краіны, беларускай эканомікі, але мы бачым жаданне заходніх партнёраў весці з намі канструктыўны дыялог. Для многіх гэта новыя рынкі. Асобы інтарэс у замежных банкіраў выклікаюць наведванні вытворчасці, дзе плануецца мадэрнізацыя, укараненне сучасных тэхналогій, выпуск інавацыйнай прадукцыі – гэта дазваляе на ўласныя вочы ўбачыць канкрэтыку ўкладанняў крэдытных рэсурсаў.
Паказальна, што большасць замежных партнёраў прадастаўляюць нам крэдытныя рэсурсы, а гэта мільярды долараў ЗША, без гарантый урада Беларусі. Чым не крэдыт даверу? Сродкі, у тым ліку, выкарыстоўваюцца пры рэалізацыі інвестыцыйных праектаў нашых кліентаў.


- Якія праекты, рэалізаваныя банкам у 2014 годзе - першай палове 2015 года, можна назваць знакавымі?

 

Pisarik-international-buisness-2

Падпісанне крэдытнага пагаднення з кансорцыўмам швейцарскіх банкаў UBS AG, Credit Suisse AG і Zürcher Kantonalbank.
На фота (злева направа): Бруна Фру – кіраўнік продажаў і экспартнага фінансавання, ZKB; Клод Лаупэр  - дырэктар дэпартамента Банкаўскай і гандлёвай сіндыкацыі развіваючыхся рынкаў, ZKB; Сяргей Пісарык - Старшыня Праўлення, Беларусбанк; Клайд Ізелін – кіруючы дырэктар, экспартнае фінансаванне, UBS, Сяргей Гірач – намеснік начальніка ўпраўлення гандлёвага і структурнага фінансавання дэпартамента міжнароднага  бізнесу, Беларусбанк.

- За ўзгаданы перыяд мы ажыццявілі шэраг здзелак, сярод якіх, калі так можна сказаць, ёсць як звычайная руцінная работа, так і «знакавыя» здзелкі. Калі я так гавару, то часта задаюся думкай, што ўчорашнія «знакавыя» здзелкі сталі сёння для нашых супрацоўнікаў часткай звыклага бізнес-працэсу, і колькасць іх сёння вымяраецца сотнямі. Але, тым не менш, не без гонару агучу некаторыя з іх.
Напрыклад, звычайны сіндыкат, але, улічваючы даволі складаныя ўмовы прыцягнення, я маю на ўвазе турбулентнасці з расійскай нацыянальнай валютай у другой палове снежня 2014 года – гэта быў яркі зладжаны камандны ход нашых спецыялістаў і расійскіх калег.
У мінулым годзе мы падпісалі дэбютны крэдытны дагавор з ЗАТ АКБ «Новикомбанк» пад страхоўку ЭКСАР (Расійская Федэрацыя) аб фінансаванні здзелкі ААТ «Мінскі аўтамабільны завод - кіруючая кампанія холдынгу «БЕЛАЎТАМАЗ» на пастаўку рухавікоў унутранага згарання вытворчасці ААТ «Аўтадзізель». Так што мазаўская тэхніка з яраслаўскімі рухавікамі становіцца больш канкурэнтнай, а гэта значыць, што і па аб’ёмах, і па геаграфіі расце экспарт, стымулюючы эфектыўнае развіццё айчыннай эканомікі. Нельга ў гэтай сувязі таксама не загадаць фінансаванне будаўніцтва «пад ключ» аб’екта па вытворчасці паперы-асновы для дэкаратыўных абліцовачных матэрыялаў рэспубліканскага вытворчага ўнітарнага прадпрыемства «Завод газетнай паперы» ў Шклове. Прадукцыйнасць новай лініі складзе 30 000 тон у год. У цяперашні час на беларускім рынку попыт на паперу для дэкаратыўных абліцовачных матэрыялаў пакрываецца за кошт паставак з-за мяжы. Новую імпартазамяшчальную вытворчасць плануецца ўвесці да канца бягучага года. Бясспрэчна, гэты праект – рэальная падтрымка інавацыйнай эканомікі і яго па праву можна назваць знакавым.
У маі мы дамовіліся аб фінансаванні Дзяржаўнай карпарацыяй «Банк развіцця і знешнеэканамічнай дзейнасці» Расійскай Федэрацыі закупкі дадатковага рухомага саставу для Мінскага метрапалітэна – 15 вагонаў метро ў расійскага ААТ «Метровагонмаш», што дазволіла значна абнавіць рухомы састаў, паколькі сёння сталічная падземка налічвае каля 180 вагонаў. З уводам новых станцый другой лініі з’явілася надзённая патрэба пашырэння рухомага саставу. Так што прыцягнутыя намі сродкі дазволяць рэальна павялічыць і абнавіць парк. Мінчане і госці сталіцы за тое і любяць «падземку», што дакладна вытрымліваецца інтэрвал руху і забяспечваецца камфорт. Прыемна ўсведамляць, што банк мае дачыненне да якасці транспартнага абслугоўвання ў горадзе.
Знакавай у бягучым годзе таксама з’яўляецца здзелка з адным з расійскіх банкаў па прыцягненні 100 млн. долараў на мэты фінансавання разлікаў па знешнегандлёвых кантрактах.
І гэта далёка не поўны пералік сур’ёзных праектаў, рэалізуемых у краіне за кошт прыцягнутых банкам рэсурсаў з-за мяжы.

 - Калі мець на ўвазе дыверсіфікацыю прыцягнення рэсурсаў, якія напрамкі супрацоўніцтва яшчэ існуюць?
- Адна з сфер супрацоўніцтва з замежнымі фінансавымі інстытутамі – гандлёвае фінансаванне, што пастаянна запатрабавана кліентамі. Дынаміка аперацый – штогадовы прырост практычна на 10-15%. У мінулым годзе прыцягнута амаль 1,3 млрд. долараў ЗША ў эквіваленце. Упершыню арганізавана постфінансаванне ў рамках дакументарных акрэдытываў пад страхавое пакрыццё расійскай кампаніі ЭКСАР.

- Самае першае замежнае прадстаўніцтва банка было адкрыта ў Маскве. Яно і зразумела, Расія – гэта вельмі салідны фінансавы рынак. Ды і краіны СНД не варта скідаць з рахункаў. Як будуюцца адносіны з імі?
- Бачу ўзаемную зацікаўленасць, сведчанне таму – Міжнародны эканамічны форум краін – удзельнікаў СНД «Інтэграцыя – новыя магчымасці і шляхі выхаду з крызісу», які адбыўся ў Маскве і сабраў больш чым паўтары тысячы лідараў бізнесу, фарміруючых сучаснае аблічча Садружнасці. Было шмат знаёмстваў, сустрэч, перамоў. У прыватнасці, з кіраўнікамі РОСЭКСІМБАНКА і Прамсувязьбанка мы абмеркавалі перспектывы далейшага супрацоўніцтва. У цэлым, форум – гэта эфектыўная платформа для плённага дыялогу прадстаўнікоў дзяржаўных і бізнес-структур, выдатная пляцоўка для зносін, абмену вопытам, канструктыўнага ўзаемадзеяння і, што вельмі важна, прасоўвання банка на даволі маштабныя рынкі постсавецкай прасторы. У транснацыянальным банкаўскім бізнесе не варта чакаць хуткіх вынікаў, але яны абавязкова будуць, калі паслядоўна будаваць дыялог і выкарыстоўваць лепшыя сусветныя практыкі.

- З якой колькасцю банкаў свету ў «Беларусбанка» партнёрскія адносіны?
- На пачатак 2015 года карэспандэнцкая сетка банка налічвала 1 200 фінансавых інстытутаў у 83 краінах свету. Банкам адкрыты каррахункі «Ностра» ў асноўных сусветных фінансавых цэнтрах, разлікі ажыццяўляюцца ў 15 валютах. Словам, геаграфія вельмі шырокая.
Высокія вынікі работы ў сферы гандлёвага фінансавання, а таксама якасць ажыццяўлення міжнародных плацяжоў адзначаны ўручэннем банку мноства ўзнагарод ад банкаў-партнёраў.
Трэба таксама адзначыць, што ў 2014 годзе часопіс The Banker высока ацаніў кошт брэнда ААТ «ААБ Беларусбанк», размясціўшы яго ў ліку Топ 500 Банкаўскіх брэндаў свету.
Па ацэнках нашых замежных партнёраў па капітале першага ўзроўню згодна з рэйтынгам часопіса The Banker «Беларусбанк» з’яўляецца банкам № 1 у Беларусі, № 14 у Цэнтральнай і Усходняй Еўропе, № 399 у свеце.
У сакавіку стала вядома, што часопіс Global Finance назваў ААТ «ААБ Беларусбанк» лепшым беларускім банкам на развіваючыхся рынках Цэнтральнай і Усходняй Еўропы ў 2015 годзе. Гэтага звання «Беларусбанк» удастойваецца чацвёрты раз. Улічваецца многае: рост актываў, даходнасць, доўгатэрміновая стратэгія, абслугоўванне кліентаў, канкурэнтаздольнасць і інавацыйныя прадукты, пазіцыі на рынку, выкарыстанне перадавых рашэнняў у бізнесе.
Месяцам раней прыйшла інфармацыя аб тым, што яшчэ адно аўтарытэтнае міжнароднае выданне EMEA Finance ужо пяты раз запар прысвоіла ААТ «ААБ Беларусбанк» званне «Лепшы банк у Рэспубліцы Беларусь».
Усё разам узятае стварае пазітыўную рэпутацыю банка на сусветных фінансавых рынках. Гэта высокія пазіцыі, але ў планах узняцца яшчэ вышэй. Спыняцца на дасягнутым – не ў нашых правілах. Маючы статус саліднага банка, мы не забываем:   Лягчэй за ўсё плыць па цячэнні. Складаней веславаць супраць. Але самая чыстая і халодная вада заўсёды ля вытока ракі.

- Калі раней «Беларусбанк» пераважна рабіў стаўку на заходні вектар у прыцягненні інвестыцыйных і незвязаных рэсурсаў, то сёння ідзе актывізацыя таксама і ўсходняга напрамку. Чым гэта абумоўлена?
- Як кажуць, нічога асабістага. Мы развіваем шматвектарнае супрацоўніцтва. Першыя нашы замежныя прадстаўніцтвы былі адкрыты ў Расіі і Польшчы ў 1997-м годзе, потым - у 2003 годзе ў Франкфурце-на-Майне. З 2007 года прадстаўніцтва «Беларусбанка» – адзінага з айчынных банкаў – адкрытага ў Пекіне і заклікана прасоўваць на фінансавым рынку Кітайскай Народнай Рэспублікі інтарэсы эканомікі Беларусі.
У мінулым годзе я ў складзе ўрадавай дэлегацыі быў у КНР. Паверце, там ёсць чаму павучыцца. Актыўна выкарыстоўваемыя бязлюдныя тэхналогіі дазволілі кітайскім банкам істотна скараціць выдаткі, аптымізаваць бізнес-працэсы. Карысны абмен інфармацыяй меў месца і ў час сустрэч з прадстаўнікамі China Development Bank і The Export-Import Bank of China. Развіццё доўгатэрміновых партнёрскіх адносін цікава і выгадна нашым банкам.

 

С. Пісарык ацэньвае магчымасці  бязлюдных тэхналогій  China Guangfa Bank. Студзень  2014 года


Абсалютна лагічна, што ў ходзе ўрадавага візіту Старшыні КНР Сі Цзыньпіна ў Рэспубліку Беларусь з удзелам першых асоб дзяржаў 10 мая 2015 года адбылася ўрачыстая цырымонія падпісання Генеральнага крэдытнага пагаднення з Дзяржаўным банкам развіцця Кітая аб прыцягненні крэдытнай лініі ГБРК у памеры 300 млн. USD на дастаткова выгадных умовах, якія дазваляюць значна скараціць часавыя рамкі прыцягнення такога кшталту крэдытаў ад Дзяржаўнага Банка Развіцця Кітая. У якасці забеспячэння выкарыстоўваецца гарантыя Урада Рэспублікі Беларусь на карысць кітайскага банка. Крэдытная лінія прыцягваецца на тэрмін 15 гадоў, у тым ліку льготны перыяд – да 5 гадоў.

 

Старшыня Праўлення ААТ «ААБ Беларусбанк» Сяргей Пісарык вітае Ху Хуайбана (Hu Huaibang), Старшыню Праўлення Дзяржаўнага банка развіцця  Кітая. 10 мая 2015 года. Мінск

 

Старшыня праўлення ААТ «ААБ Беларусбанк» Сяргей Пісарык і  віцэ-прэзідэнт China Eximbank Сунь Пін падпісваюць крэдытнае пагадненне. Мінск. 26 верасня 2014 года.

 

Але вы маеце рацыю, заходні вектар, вядома ж, па-ранейшаму застаецца актуальным. На прайшоўшай у сакавіку міжнароднай канферэнцыі «Беларусь і СНД: гандлёвае фінансаванне 2015», генеральным спонсарам якой, дарэчы, выступіў «Беларусбанк», заходняя інвестыцыйная супольнасць была актыўна прадстаўлена. Фінансавым колам Германіі, Чэхіі, Польшчы, Расіі, Славакіі, Аўстрыі, Італіі і не толькі цікавы эканамічны клімат краіны, перспектывы беларускай эканомікі і патрэбы беларускага рынку ў экспартным і гандлёвым фінансаванні.

У міжнародным бізнесе мы маем поспехі, аднак патэнцыял далёка не вычарпаны. Мяркую, што нашы замежныя партнёры будуць працягваць практыку канструкцыйнага і ўзаемавыгаднага супрацоўніцтва з «Беларусбанкам», прымуць удзел у рэалізацыі інвестыцыйных праектаў банка і яго кліентаў. Наша стратэгія развіцця міжнароднага бізнесу будуецца на палітыцы адкрытасці і накіравана на нарошчванне прысутнасці на сусветных рынках капіталу. І напрыканцы, узгадаем Канфуцыя, які сказаў:  Важна не тое месца, якое мы займаем зараз, а той напрамак, у якім мы рухаемся.