Інтэрв'ю з кіраўніком
25.04.2015

Эвалюцыя прыярытэтаў: банкі зацікаўлены ў супрацоўніцтве з малым і сярэднім бізнесам

За апошняе дзесяцігоддзе колькасць карпаратыўных кліентаў «Беларусбанка» вырасла больш чым у два разы. Сёння ў банку абслугоўваецца каля 90 тыс. суб’ектаў гаспадарання розных галін, форм уласнасці і маштабаў бізнесу. Аб тым, як змяніліся патрэбы банкаўскіх кліентаў за апошні час, якія рашэнні ў цяперашніх няпростых умовах прапануе юрыдычным асобам найстарэйшы банк краіны і што чакае сектар карпаратыўнага банкаўскага бізнесу Беларусі, расказаў намеснік Старшыні Праўлення «Беларусбанка» Аляксандр ПАЛІЎКА.

— Аляксандр Іосіфавіч, у няпростых умовах, якія склаліся сёння ў краіне, штосьці зменіцца ў рабоце банка з карпаратыўным сегментам і ў перавагах саміх кліентаў пры выбары банка?

— Мы разумеем, што ў цяперашніх умовах будуць мець поспех тыя ўдзельнікі фінансавага рынку, якія змаглі распрацаваць для кліентаў мноства рашэнняў у адпаведнасці з іх патрэбамі і, што таксама важна, навучыліся працаваць з імі аператыўна і дакладна. Кліент прыйдзе ў той банк, які прапанаваў яго бізнесу лепшае рашэнне па хуткасці, структуры здзелкі і цане. Таму ў «Беларусбанку» мы аптымізавалі арганізацыйную структуру і бізнес-працэсы, істотна змянілі сістэму абслугоўвання карпаратыўнага сегмента. Сёння ўзаемадзеянне з кліентам адбываецца ў адзінай кропцы па прынцыпе «аднаго акна», што значна павышае якасць і аператыўнасць, бо часам менавіта гэтыя фактары выходзяць для бізнесу на першы план.

Улічваючы дынамічнасць рынку банкаўскіх паслуг, «Беларусбанк» падтрымлівае свой прадуктовы рад у актуальным стане і пастаянна ўдасканальвае тэхналогіі прадастаўлення паслуг. Сёння мы гатовы прадаставіць карпаратыўнаму сегменту поўны комплекс запатрабаваных рынкам паслуг, прымяняючы канкурэнтную тарыфную і працэнтную палітыку.

— Якія канкурэнтныя перавагі дазваляюць кліентам зрабіць выбар на карысць «Беларусбанка»?

— Безумоўна, нашай важнай перавагай, якой немагчыма не скарыстацца, з’яўляецца развітая інфраструктура, здольная забяспечыць даступнасць банкаўскіх паслуг па ўсіх рэгіёнах і кутках рэспублікі. Наяўнасць служб продажу ва ўстановах банка дазваляе «ахапіць клопатам» кожнага кліента.

Надзейнасць, станоўчы вопыт работы і бездакорная рэпутацыя Банка, у тым ліку на міжнародным рынку, дазволілі дасягнуць высокай ступені даверу і лаяльнасці кліентаў. Работа з карпаратыўнымі кліентамі будуецца на прынцыпах прымянення комплекснага кліентаарыентаванага падыходу да абслугоўвання бізнесу, пабудавання доўгатэрміновых і ўзаемавыгадных адносін, арыентаваных на перспектыву.

— Як адбілася рыначная сітуацыя на дэпазітах юрыдычных асоб? Ці варта гаварыць аб павелічэнні даверу прыватных кампаній да банкаў з дзяржаўным удзелам?

— Недастатковасць ліквіднасці і рэзкае змяненне курса беларускага рубля да асноўных валют вымушаюць банкі больш актыўна прыцягваць пасівы на ўнутраным рынку, і ўсё гэта непазбежна прыводзіць да росту ставак па дэпазітах.

Пры выбары банка, думаю, давер кліента адыгрывае вырашальную ролю. У свеце апошніх падзей на фінансавым рынку Беларусі можна выказаць здагадку, што дэпазіты будуць перацякаць у банкі з дзяржаўным удзелам. Для нас нейкім індыкатарам даверу служыць той факт, што сродкі карпаратыўных кліентаў у «Беларусбанку» паступова павялічваюцца. Сёння без уліку сродкаў бюджэту нам належыць 32% рынку дэпазітаў юрыдычных асоб.

— Кліентамі «Беларусбанка» з’яўляюцца найбуйнейшыя прадпрыемствы рэспублікі, якія аказваюць непасрэдны ўплыў на яе эканоміку. Тым не менш, банк адкрыта заяўляе аб аказанні садзеяння развіццю малога і сярэдняга бізнесу…

— Банк заўсёды імкнецца стаць надзейным партнёрам для любога кліента, незалежна ад аб’ёмаў яго бізнесу. Разумеючы што малое і сярэдняе прадпрымальніцтва з’яўляецца найбольш масавым, гібкім і дынамічна развіваючымся сегментам эканомікі, яго падтрымка, стварэнне ўмоў для паскоранага развіцця з’яўляецца адным з прыярытэтных напрамкаў нашай дзейнасці. «Беларусбанк» аказвае ўсямернае садзеянне развіццю дзелавой ініцыятывы, вытворчага патэнцыялу малога і сярэдняга бізнесу за кошт аптымізацыі прадуктовай прапановы.

— Што «Беларусбанк» можа прапанаваць малому і сярэдняму прадпрымальніцтву?

— Сёння прадуктовая лінейка нашага банка дазваляе выбраць найбольш прымальны варыянт супрацоўніцтва. Побач з рознічным продажам паслуг мы прапануем кліентам розныя варыянты «пакетнага» абслугоўвання, якія дазваляюць аптымізаваць набор спажываемых паслуг і скараціць іх кошт.

Кліентам малога і сярэдняга прадпрымальніцтва прадастаўляецца магчымасць правядзення разлікаў з выкарыстаннем праграмнага комплекса «Кліент-банк (WEB)», які дазваляе аператыўна ажыццяўляць аперацыі праз Інтэрнэт без прывязкі да месца знаходжання. Шырокае распаўсюджанне атрымаў і новы мабільны прадукт, які мы распрацавалі ў першую чаргу для малога і сярэдняга бізнесу — «Аддалены дэпазіт». Гэта прадуктовае рашэнне дазваляе дыстанцыйна размяшчаць у дэпазіты свабодныя грашовыя сродкі ў беларускіх рублях. Пры гэтым для заключэння дагавору з кліентам прымяняецца прынцып публічнай аферты. Па спрошчанай працэдуры малому і сярэдняму бізнесу прадастаўляюцца мікракрэдыты, а таксама лізінгавыя паслугі.

У нашай кліенцкай базе доля малога і сярэдняга карпаратыўнага сегменту складае больш за 70% і, сапраўды, работа з ім на бліжэйшыя гады застанецца адной з нашых прыярытэтных задач.  

Неабходна ўлічваць і той факт, што дробны бізнес можа вырасці да сярэдняга, а сярэдні бізнес – перарасці ў буйны… І, пагадзіцеся, кліент, верагодней за ўсё, працягне супрацоўнічаць менавіта з банкам, які даў яму свайго роду «штуршок», аказваючы садзеянне бізнес-росту.