Падарунак ад «Беларусбанка»

Філіял № 500 — Мінскае ўпраўленне ў якасці бязвыплатнай спонсарскай дапамогі перадаў Мінскай абласной арганізацыі інвалідаў мікрааўтобус «Газель», прызначаны для перавозкі людзей з абмежаванымі фізічнымі магчымасцямі. Афіцыйная перадача ключоў ад аўтамабіля адбылася ў Мінску на тэрыторыі прадпрыемства «БелГАЗаўтасэрвіс».

— Інваліды застаюцца адной з найбольш сацыяльна неабароненых груп насельніцтва нашай краіны. Па-ранейшаму ў іх узнікаюць вялікія праблемы з перамяшчэннем у межах населенага пункта і тым больш за яго межамі. На вялікі жаль, інваліды часта аказваюцца прыкаванымі да месца свайго пражывання. Пагэтаму, перадаючы мікрааўтобус грамадскай арганізацыі інвалідаў, мы разумеем, наколькі ён ім неабходны. Гэты аўтамабіль будзе абсталяваны спецыяльным пад’ёмнікам, каб было зручна закатваць інвалідную каляску, і дапаможа людзям з абмежаванымі магчымасцямі вырашаць многія сацыяльныя праблемы, — падкрэсліў начальнік філіяла № 500 — Мінскага ўпраўлення Дзмітрый Грыбоўскі.

З вялікай удзячнасцю падарунак прымала старшыня абласной арганізацыі інвалідаў Ганна Гарчакова:

— Вялікі дзякуй «Беларусбанку». Нашай арганізацыі, разгрупаванай па ўсёй Мінскай вобласці, такі аўтамабіль сапраўды неабходны. Страціўшаму здольнасць свабодна перамяшчацца чалавеку важна не адрывацца ад гэтага свету, навучыцца жыць у інваліднай калясцы, не адчуваючы бар’ераў у сваім жыцці. Добра, што ў аўтамабілі, які мы прымаем у дар, свабодна перамяшчаюцца людз і ў інвалідных калясках, менавіта гэты параметр для нас быў найбольш важны.

Ганна Гарчакова — чэмпіёнка свету і Еўропы па спартыўных танцах на інвалідных калясках. Яна ж узначальвае школу танца «Дар» для людзей з абмежаванымі фізічнымі магчымасцямі.

— Галоўнай мэтай нашай школы з’яўляецца рэабілітацыя і інтэграцыя ў грамадства інвалідаў з парушэннямі апорна-рухальнага апарата. Школа існуе другі год і набірае папулярнасць. Нашы вучні ўдзельнічаюць у розных спаборніцтвах, ужо станавіліся лаўрэатамі міжнародных творчых фестываляў, — падкрэсліла Ганна і, з усмешкай, дадала. — У рабоце школы танцаў гэты аўтамабіль таксама вельмі спатрэбіцца.

На мерапрыемстве прысутнічаў таксама намеснік старшыні Мінаблвыканкама Віктар Сірэнка, які адзначыў, што сёння «Беларусбанк» не толькі зарабляе грошы, але і аказвае спонсарскую дапамогу тым, хто асабліва востра мае ў ёй патрэбу. І гэта вельмі важна, паколькі міласэрнасць і спагадлівасць заўсёды былі і будуць адметнай рысай нашых людзей.